Türkmenistanly mekdep okuwçylary Özbegistanda geçirilen Abu Reýhan Biruny adyndaky III Halkara himiýa olimpiadasynda üstünlikli çykyş etdiler. Bu barada Türkmenistanyň Bilim ministrliginiň sosial ulgamdaky sahypasy haabr berdi.

3 — 10-njy noýabr aralygynda geçirilen halkara olimpiadada Azerbaýjan, Kosta-Rika, Gruziýa, Ysraýyl, Iordaniýa, Gazagystan, Gyrgyzystan, Malaýziýa, Mongoliýa, Katar, Russiýa, Saud Arabystany, Täjigistan, Tailand, Türkiýe, Türkmenistan we Özbegistan ýaly ýurtlaryň wekilleri bäsleşdiler. Olimpiadanyň jemleri boýunça Aşgabat şäherindäki S.Türkmenbaşy adyndaky umumybilim berýän mekdep-internatynyň okuwçysy Pälwan Ilmämmedow altyn medalyň eýesi boldy.

Özbek metbugatynyň ýazmagyna görä, olimpiadanyň netijeleri esasynda gatnaşyjylar 13 altyn, 25 kümüş we 37 bürünç medala mynasyp boldular.