Fransiýanyň Prezidenti Emmanuel Makron Fransiýa Respublikasynyň Türkmenistandaky Adatdan daşary we Doly ygtyýarly ilçisini bellemek baradaky Permana gol çekdi. Ýurdyň hökümetiniň resmi saýtynda çap edilen resminama laýyklykda, bu wezipä Daşary işler boýunça baş sekretar Alena Grand bellenildi.

2026-njy ýylyň 24-nji iýulynda kabul edilen Permana Fransiýanyň Premýer-ministri Sebastien Lekorný we Ýewropa we daşary işler ministri Žan-Noel Barro hem gol çekdi.

Alena Grand Fransiýanyň Ýewropanyň we daşary işler ministrliginiň ulgamynda 25 ýyldan gowrak iş tejribesi bolan ussat diplomatdyr. Ol diplomatik işine 2001-nji ýylda Fransiýanyň Minsk şäherindäki ilçihanasynda metbugat boýunça attaşe we terjimeçi hökmünde başlady. 2004–2008-nji ýyllarda Fransiýanyň Namibiýanyň Windhuk şäherinde ilçiniň kömekçisi wezipesinde işledi. Şondan soň üç ýyllap Pariždäki ministrligiň işgärler gullugynda zähmet çekdi.

2011–2013-nji ýyllarda Grand Ýewropa Bileleşigi boýunça Direktoratda redaktor bolup işledi. 2013–2017-nji ýyllarda bolsa Fransiýanyň Rumyniýadaky ilçihanasynyň metbugat boýunça geňeşçisi wezipesini eýeledi. 2017–2021-nji ýyllar aralygynda Fransiýanyň Özbegistandaky ilçihanasynyň birinji geňeşçisi bolup işledi.

Fransiýa gaýdyp geleninden soň, Alena Grand birnäçe ýyllap ministrligiň işgärler gullugynda dürli ýolbaşçy wezipelerde, şol sanda hünär ösüşi boýunça kiçi direktoratyň başlygynyň orunbasary, soňra bolsa bölüm başlygy hökmünde zähmet çekdi. 2025-nji ýylyň sentýabryndan bäri ol ýokary derejeli ýolbaşçy işgärler boýunça ygtyýarly wezipede işledi.

Fransiýanyň Türkmenistandaky öňki ilçisi Filipp Merlen, ýurdumyzdaky diplomatik missiýasy üç ýyl dowam edenden soň, türkmen kärdeşlerine we ýurtdaky fransuz jemgyýetçiligine hoşlaşyk ýüzlenmesi bilen çykyş etdi. Ol öz işlän döwründe oňa görkezilen goldaw we hyzmatdaşlyk üçin olara minnetdarlyk bildirdi. Alena Granda täze wezipesinde üstünlikler arzuw edip, Filipp Merlen onuň hem Türkmenistanda mähirli garşylanjakdygyna we goldaw bildiriljekdigine ynam bildirdi.