3–8-nji awgust aralygynda Portugaliýadan hemmeleri öz içine alýan bilim, ýagny inklýuziw bilim boýunça halkara bilermen hanym Filomena Pereýra Türkmenistanda bir hepdelik tehniki iş saparynda boldy.

Türkmenistanyň Bilim ministrliginiň inklýuziw bilimi ösdürmek boýunça alyp barýan işleriniň çäklerinde, ÝUNISEF-iň tehniki goldawy bilen geçirilen iş saparynyň esasy maksady bu ugurda gazanylan ösüşleri seljermek we mundan beýläk ýerine ýetirilmeli işleriň ugurlaryny kesgitlemekden ybarat boldy.

Iş saparynyň dowamynda Türkmenistanyň Bilim ministrliginiň, welaýat derejesindäki bilim dolandyryş edaralarynyň wekilleri, mugallymlar, mugallymlaryň hünär derejesini ýokarlandyrmak ulgamynyň hünärmenleri, dürli ugurlardan hünärmenleri birleşdirýän toparlaryň agzalary, psihologik-lukmançylyk-pedagogik toparlaryň wekilleri, ýokary okuw mekdepleriniň hem-de beýleki hyzmatdaş guramalaryň wekilleri bilen duşuşyklar geçirildi.

Maslahatlaryň, ýerinde geçirilen saparlaryň we amaly ara alyp maslahatlaşmalaryň dowamynda gatnaşyjylar Türkmenistanyň Bilim ministrligi tarapyndan ozal alnyp barlan işleriň netijelerini seljerdiler hem-de dürli aýratyn bilim zerurlyklary bolan çagalaryň bilim almaga mümkinçiliklerini giňeltmek boýunça mundan beýläk görülmeli çäreler barada ylalaşdylar.

Bilim ulgamynyň hünärmenleriniň hünär mümkinçiliklerini ýokarlandyrmak, çagalaryň şahsy bilim zerurlyklaryny ýüze çykarmaga we olara zerur goldawy guramaga gönükdirilen çemeleşmeleri kämilleşdirmek, şeýle hem inklýuziw bilimiň durnukly ornaşdyrylmagyny üpjün etmek maksady bilen halypalyk ulgamyny we hünär taýdan kämilleşdiriş okuwlaryny ösdürmek meselelerine aýratyn üns berildi.

Iş saparynyň çäklerinde Türkmenistanyň Bilim ministrliginiň we ÝUNISEF-iň wekilleri Ahal we Balkan welaýatlaryndaky inklýuziw bilim boýunça synag taslamalary durmuşa geçirilýän mekdebe çenli çagalar edaralaryna we umumybilim berýän mekdeplere baryp gördüler. Olar inklýuziw bilimiň iş ýüzünde ornaşdyrylyşy bilen tanyşdylar, şeýle hem mugallymlar, bilim edaralarynyň ýolbaşçylary, sebit utgaşdyryjylary we dürli ugurlardan hünärmenleri birleşdirýän toparlaryň agzalary bilen gazanylan netijeler, bar bolan meseleler hem-de her bir çaganyň okuw-terbiýeçilik işine doly gatnaşmagyny üpjün etmek üçin zerur goldaw çäreleri barada pikir alyşdylar.

ÝUNISEF-iň metbugat beýanatynda bellenilişi ýaly, iş saparynyň dowamynda işlenip düzülen teklipler indiki tapgyrdaky işleriň esasy bolup hyzmat eder. Bu işleriň çäklerinde mugallymlary taýýarlamak ulgamyny kämilleşdirmek, gözegçilik ulgamyny ösdürmek hem-de inklýuziw bilim boýunça öňdebaryjy tejribäni ýaýratmak göz öňünde tutulýar. Şeýle çäreler synag taslamalary durmuşa geçirilýän edaralarda gazanylan üstünlikli tejribäni giňden ýaýratmaga we inklýuziw bilim ýörelgelerini has giň gerimde ornaşdyrmaga mümkinçilik berer.