Ýaponiýanyň startap kompaniýasy we lukmançylyk edarasy 2028-nji ýyldan başlap doňuz böwregini näsag adama geçirmek boýunça kliniki synaglary geçirmegi meýilleşdirýär. Şunuň bilen baglylykda, olar bu maksat üçin genetiki taýdan üýtgedilen doňuzlary köpeldip başlandyklaryny mälim etdiler.

Meýdzi uniwersitetiniň binýadynda döredilen PorMedTec startap kompaniýasy geljek maliýe ýylynda, ýagny aprel aýynda başlanjak döwürde, kliniki synaglary geçirmek baradaky meýilnamany degişli döwlet edaralaryna hödürlemegi göz öňünde tutýar. Meýilnama tassyklanan ýagdaýynda, bu Ýaponiýada şeýle görnüşdäki ilkinji kliniki synag bolar.

Kompaniýanyň prezidenti Gendziro Miwa Kanagawa prefekturasynyň Kamakura şäherindäki «Şonan Kamakura Jeneral» hassahanasy bilen geçirilen bilelikdäki metbugat maslahatynda: «Maksadymyz agyr böwrek ýetmezçiligi bilen kesellän näsaglar üçin adamyň böwregini çalyşmak we dializ bilen birlikde bejerginiň goşmaça mümkinçiligi hökmünde bu usuly ösdürmekdir» —diýip, belledi.

Kliniki synaglar geçiriljek ikinji lukmançylyk edarasy bolsa Ýaponiýanyň demirgazygyndaky Sapporo şäherinde ýerleşýän Hokkaýdo uniwersitetiniň hassahanasy bolar.

Doňuz böwreklerini almak üçin niýetlenen ýörite toplumlar 2027-nji maliýe ýylynyň ahyryna çenli hassahanalaryň golaýynda dörediler. Startap 2030-njy ýylda doňuz böwregini adama geçirmek usuly üçin regeneratiw lukmançylygyň önümi hökmünde şertli tassyklama almagy, 2033-nji ýyla çenli bolsa bu usuly bejerginiň adaty görnüşleriniň birine öwürmegi maksat edinýär.

Bu maksat bilen köpeldilýän doňuzlarda 69 genetiki üýtgetme girizildi. Şeýle üýtgetmeler geçirilen böwregiň näsagyň bedeni tarapyndan ret edilmek howpuny azaltmaga gönükdirilendir.