Türkmenistanyň Lebap welaýatynda ýerleşýän «Bagtyýarlyk» çagalar sagaldyş merkezi Türkmenabat şäheriniň golaýynda, Amyderýanyň kenarynda ýerleşýär. Bu ýerde çagalaryň göwnejaý dynç almagy üçin ähli şertler döredilipdir. Merkezde kinozal, amfiteatr, kompýuter otaglary, kitaphana, açyk we ýapyk ýüzüş howuzlary bar — diýip, «Türkmenistan: Altyn asyr» neşiri habar berýär.

Tomus möwsüminde üç tapgyrda bu merkezde jemi 900 çaga dynç alar. Dynç alyş maksatnamasynyň çäklerinde çagalar gadymy Amul galasyna we welaýatyň taryhy we ülkäni öwreniş muzeýine baryp görýärler. Şeýle hem olar Türkmenabat şäheriniň gözel ýerleri, şol sanda Amyderýanyň üstünden gurlan täze köprüler we «Bitaraplyk» seýilgähi bilen tanyşýarlar.

Mundan başga-da, çagalar Seýitnazar Seýdi adyndaky döwlet sazly drama teatrynda görkezilýän spektakllara tomaşa edýärler.

Çagalaryň beden taýdan sazlaşykly ösmegini üpjün etmek maksady bilen, «Bagtyýarlyk» çagalar sagaldyş merkezinde sportuň dürli görnüşleri, şol sanda milli oýunlar boýunça yzygiderli ýaryşlar geçirilýär. Ýakynda bu ýerde mekdep okuwçylarynyň arasynda geçirilen ýangyn-amaly sport bäsleşigi aýratyn ýatda galyjy çäreleriň biri boldy.