Şahmat boýunça Türkmenistanyň ýygyndy topary 3 — 11-nji iýun aralygynda Gazagystanyň Aktobe şäherinde geçiriljek «Wladimir Dworkowiçiň Ýadygärligi — Aktobe Open 2026» halkara ýaryşynda çykyş eder. Bu barada Türkmenistanyň Şahmat federasiýasynyň metbugat gullygy habar berýär.

Ýaryşyň çäginde iki sany bäsleşik — «Masters» we «Open» turnirleri guralar. Çärede 21 ýurtdan şahmatçylara, şol sanda 23 sany grossmeýstere garaşylýar. Ýaryşyň baýrak gaznasy 100 000 ABŞ dollaryna barbardyr.

Bu turnirde çykyş etmek türkmen ýygyndysynyň sentýabr aýynda Samarkantda geçiriljek 46-njy Bütindünýä şahmat olimpiadasyna görjek taýýarlygynyň bir bölegi bolar.

Gönüden-göni turniriň öňüsyrasynda, ýagny 18-nji maý — 2-nji iýun aralygynda Türkmenistanyň ýygyndy topary Gazagystanyň Şahmat federasiýasynyň çakylygy boýunça Gazagystanyň Kokşetau şäherinde okuw-türgenleşik bäsleşigini geçdi. Bu ýerdäki «Şahmat öýüniň» binasynda guralan okuwlar halkara grossmeýster Aleksandr Rahmanowyň ýolbaşçylygynda günde 6-7 sagatlap dowam etdi.

«Gatnaşyjylar üçin örän gyzykly. Aleksandr Andreýewiç dogry pikirlenmegi we pozision şahmaty öwredýär. Tälimçi, esasan, toparlaýyn oýna we oňa psihologik taýdan taýýarlyk görmäge aýratyn üns berýär. Bu bolsa golaýlap gelýän olimpiadanyň öňüsyrasynda örän wajypdyr» diýip, Türkmenistanyň Şahmat federasiýasynyň Baş sekretary Mergen Kakabaýew belledi.

Topar Aşgabada gaýdyp gelenden soň hem Gazagystanyň Şahmat federasiýasy bilen hyzmatdaşlyk dowam etdiriler. Ýagny, Aleksandr Rahmanow bilen goşmaça onlaýn sapaklary geçirmek meýilleşdirilýär.