24-25-nji maýda Aşgabatda «Ak şäherim Aşgabat 2026» («WCA 2026») XXV köpugurly halkara sergisi we maslahaty geçiriler. Forumyň şu ýylky şygary — «Ählumumy gepleşiklerden amaly işlere geçmek: durnukly, inklýuziw we «akylly» şäherler» diýlip atlandyryldy.

Bu çärä dünýäniň 55 ýurdundan 650-den gowrak wekiliň hem-de gurluşyk, infrastruktura, energetika, tehnologiýalar we şäher gurluşygy ulgamlarynda iş alyp barýan 100-den gowrak halkara kompaniýalaryň wekilleriniň gatnaşmagyna garaşylýar.

Forumyň işewürlik maksatnamasyna BMG-niň ýokary derejeli «tegelek stoly», şeýle hem «Durnukly, «akylly» we ählumumy derejede integrirlenen paýtagty kemala getirmek» atly strategik plenar mejlisi girizildi. Şäher düzümini döwrebaplaşdyrmak, durnukly ösüş, energetika ulgamlary, sanly tehnologiýalar we halkara maýa goýum hyzmatdaşlygy ara alyp maslahatlaşmalaryň esasy temalary bolar.

Guramaçylar maslahat we sergi düzümleriniň, şeýle hem işewürlik duşuşyklarynyň we gatnaşyjylaryň halkara özara hereketleriniň maksatnamasyny taýýarlamagy tamamlaýarlar. Gatnaşmak, hemaýatkärlik bukjalary we işewürlik maksatnamasy baradaky jikme-jik maglumatlar «WCA 2026» forumynyň resmi saýtynda elýeterlidir.