Şu gün Türkmenistanyň Konstitusiýasynyň we Döwlet baýdagynyň güni mynasybetli Türkmenistanyň Mejlisinde göni wideoaragatnaşyk arkaly «Konstitusiýa döwletleriň ösüşiniň we jemgyýetiň abadançylygynyň hukuk kepili» atly maslahat geçirildi. Bu barada Türkmenistanyň Mejlisi habar berýär.  

Bu maslahata Birleşen Milletler Guramasynyň düzüm birlikleriniň Türkmenistandaky wekilhanalarynyň ýolbaşçylary, Ýewropa Bileleşiginiň Türkmenistandaky Adatdan daşary we Doly ygtyýarly Ilçisi, Merkezi Aziýa ýurtlarynyň we Azerbaýjan Respublikasynyň parlamentleriniň wekilleri gatnaşýarlar. 

Maslahatyň esasy maksady hukuk ulgamynda öňdebaryjy tejribeleri alyşmakdan, döwletimiziň hemişelik Bitaraplyk hukuk ýagdaýyna daýanyp, amala aşyrýan il-ýurt bähbitli işlerini, umumadamzat ähmiýetli başlangyçlaryny, dünýewi we hukuk döwletini gurmagyň tejribesini dünýä jemgyýetçiligine ýetirmekden ybarat boldy.