11-nji maýda Kataryň paýtagty Doha şäherinde Pars aýlagyndaky arap döwletleriniň hyzmatdaşlyk geňeşiniň (PAADHG) IV oýunlary — «Doha 2026» resmi açylyş dabarasy geçirildi. Ýaryşlar 11–22-nji maý aralygynda dowam eder. Açylyş dabarasy Aziýanyň Olimpiýa geňeşiniň başlygy, Kataryň Olimpiýa komitetiniň prezidenti we Oýunlaryň guramaçylyk komitetiniň ýolbaşçysy şeýh Joan bin Hamad Al Taniniň howandarlygynda «Al-Şakab» meýdançasynda geçirildi.

Çärä PAAGHG-a agza döwletleriň Olimpiýa komitetleriniň prezidentleri, ýokary derejeli sport ýolbaşçylary we resmi wekiller gatnaşdylar.

Pars aýlagynyň sebitiniň alty ýurdunyň müňden gowrak türgeni sportuň 17 görnüşi boýunça medallar ugrunda bäsleşer. Olaryň hatarynda gandbol, ýeňil atletika, ýüzmek, woleýbol, taekwondo, karate, boks, gylyçlaşmak, ok atmak, 3x3 basketbol, padel tennis, stoluň üstündäki tennis, bilýard, snuker, ýaýdan ok atmak, atly sport we bouling bar.

Ýüzmek boýunça ýaryşlar 12-nji maýda Hamad adyndaky suwdaky sport görnüşleri merkezinde başlandy we dört gün dowam eder. Şol gün «Al-Garafa» klubynyň meýdançasynda 3x3 basketbol duşuşyklaryna hem badalga berildi. Atly sport boýunça ýaryşlar Kataryň Şa atly sport we at çapyşyklary klubunda, gylyçlaşmak we boks boýunça bäsleşikler Aspire Dome toplumynda, ok atmak boýunça ýaryşlar bolsa Lusail şäherindäki atyşyk geçirilýän meýdançasynda geçirilýär. Ýeňil atletika boýunça ýaryşlar Suhaim bin Hamad adyndaky stadionda, gandbol boýunça duşuşyklar bolsa «Duhail» sport zalynda geçiriler.

Açylyş dabarasynda çykyş eden şeýh Joan bin Hamad Al Tani sportuň sebitiň halklarynyň arasynda dialogy, hyzmatdaşlygy we özara düşünişmegi pugtalandyrmak üçin iň möhüm meýdançalaryň biri bolmagynda galýandygyny nygtady. Şeýle hem ol soňky 20 ýylyň dowamynda Kataryň dünýä derejesindäki infrastruktura we tejribe toplap, 20-den gowrak dünýä çempionatyny kabul edendigini belledi.

PAAGHG-niň IV oýunlary ilkinji gezek Doha şäherinde geçirilýär. Mundan öňki ýaryş 2022-nji ýylyň 16–31-nji maý aralygynda Kuweýtde geçirilipdi. Ýaryşlaryň dowamynda antidoping gözegçiligini Bütindünýä antidoping agentligi (WADA) tarapyndan akkreditlenen Kataryň barlaghana merkezi üpjün edýär.