Doly derejeli we sagdyn iýmitiň elýeterliligini, azyk howpsuzlygyny üpjün etmek Türkmenistanyň durmuş-ykdysady syýasatynyň ileri tutulýan ugurlarynyň biridir. Bu barada Prezident Serdar Berdimuhamedow «Agro Pack Turkmenistan – 2026» halkara sergisine gatnaşyjylara iberen gutlag hatynda belledi diýip, TDH habar berýär.

Döwlet baştutanynyň aýtmagyna görä, ýurtda azyk önümlerini öndürmegiň durnukly ulgamlaryny döretmek we oba hojalygyny ýöretmegiň netijeli usullaryny ornaşdyrmak maksady bilen, uzak we orta möhletli maksatnamalar kabul edildi we olar üstünlikli durmuşa geçirilýär.

Türkmenistan BMG we onuň ýöriteleşdirilen edarasy bolan Azyk we oba hojalyk guramasy (FAO) bilen hyzmatdaşlygy güýçlendirýär. Agrar pudagyň, azyk we gaýtadan işleýän senagatynyň tehniki hem-de tehnologik taýdan täzeden enjamlaşdyrylmagy, öndürilýän önümleriň bäsdeşlige ukyplylygynyň ýokarlandyrylmagy boýunça çäreler görülýär.

Serdar Berdimuhamedow ýurduň hususy haryt öndürijileriniň döwlet goldawy netijesinde ekerançylykda we maldarçylykda, guşçulykda, ýyladyşhana hojalygynda, et we süýt önümlerini gaýtadan işlemekde, süýji-köke önümleriniň, miwe şireleriniň, şeýle hem täze we gaýtadan işlenen gök-bakja önümleriniň önümçiliginde uly netijeleri gazanýandyklaryny belledi.