kmen türgeni Didarbek Jumabaýew Müsüriň Ismailiýa şäherinde geçirilýän agyr atletika boýunça ýaşlaryň dünýä çempionatynda iki görnüşli ýaryşyň jeminde bürünç medal, itip götermek görnüşinde bolsa kümüş medal gazandy.

Jumabaýew 79 kilograma çenli agram derejesinde çykyş etdi. Ol siltäp götermekde 148 kg, itip götermekde 187 kg netije görkezip, iki görnüşli ýaryşyň jemi boýunça 335 kg toplady. Bu derejede birinji orny müsürli Abdulrahman Hamuda (341 kg), ikinji orny bolsa ermenistanly Narek Mkrtçýan (336 kg) eýeledi.

Ýaşlaryň dünýä birinjiligi 2–8-nji maý aralygynda Ismailiýada geçirilýär. Türkmenistana bu ýaryşda dokuz türgen — bäş gyz we dört oglan wekilçilik edýär.

Ondan öň 53 kilograma çenli agram derejesinde çykyş eden Ogulşat Amanowa iki görnüşli ýaryşyň jemi boýunça 187 kg netije bilen baýrakly orunlardan bir ädim daşda galdy — ol bürünç medal gazanan grek türgeni Mariýa Stratudaki (188 kg) bary-ýogy 1 kg utuldy. Şol agram derejesinde çykyş eden Şabnam Kerimbaýewa 15 gatnaşyjynyň arasynda 181 kg netije bilen sekizinji orny eýeledi. 63 kilograma çenli agram derejesinde çykyş eden Medine Amanowa bolsa hiç bir synanyşygy hasaba alynmandygy sebäpli, ýaryşy möhletinden öň tamamlamaga mejbur boldy.