«Arkadag» topary «Ahaly» ýeňip, Türkmenistanyň çempionatynyň ýaryş tertibinde öňdelige çykdy

«Arkadag» futbol kluby Ýokary liganyň klublarynyň arasynda geçirilýän Türkmenistanyň futbol çempionatynyň 2-nji tapgyrynyň çäginde «Ahal» toparyny 1:0 hasap bilen ýeňdi. Duşuşyk «Aşgabat» köpugurly stadionynda geçirildi.

Iki tapgyryň netijeleri boýunça «Arkadag» alty utuk toplap, toplaryň tapawudy boýunça «Altyn asyrdan» we «Şagadamdan» öňe geçip, ýaryş tertibinde birinji orny eýeledi.

Indiki tapgyrda, 18-nji aprelde «Arkadag» myhmançylykda «Altyn Asyr» bilen duşuşar, «Ahal» bolsa şol gün öz meýdançasynda «Merwi» kabul eder.

Ikinji tapgyryň beýleki oýunlarynda Türkmenbaşy şäheriniň «Şagadam» topary «Aşgabat» toparyny 3:1 hasaby bilen ýeňdi. Bu duşuşyk hem «Aşgabat» stadionynda geçirildi.

10-njy minutda myhmanlar Söhbet Allanurowyň öz derwezesine geçiren pökgüsinden soň hasaby açdylar. 25-nji minutda Serdar Gulyýew «Şagadamyň» artykmaçlygyny iki esse artdyrdy. Bäş minutdan soň öý eýeleri tapawudy azaltdy — pökgini Nurylla Reýimbaýew geçirdi. Birinji ýaryma goşulan üçünji minutda Azizbek Bekjanow ikinji sary duýduryşyny alyp, meýdandan çykaryldy we myhmanlar azlykda galdy. 59-njy minutda Serdar Gulyýew ikinji goluny geçirip, oýnuň ahyrky hasabyny kesgitledi.

«Altyn Asyr» Aşgabat şäheriniň beýleki bir topary «Köpetdagy» 3:0 hasaby bilen uly tapawut bilen ýeňdi. Bu duşuşyk hem «Aşgabat» stadionynda geçirildi. 19-njy minutda Musaguly Zorjanowyň meýdandan çykarylmagy sebäpli «Köpetdag» azlykda galdy. San taýdan artykmaçlykdan peýdalanan Ýazguly Hojageldiýewiň şägirtleri 33-nji minutda Röwşengeldi Halmämmedowyň, 55-nji minutda Begençmyrat Myradowyň we 67-nji minutda Mekan Aşyrowyň gollary bilen ýeňiş gazandylar.

«Merw» Balkanabat şäheriniň «Nebitçi» toparyny 4:1 hasaby bilen ýeňdi. Myhmanlar eýýäm 4-nji minutda Begenç Mämiýewiň goly bilen hasaby açdylar. Şeýle-de bolsa, Rahmanguly Baýlyýewiň şägirtleri tiz wagtda hasaby deňläp, öňe geçdiler: 13-nji minutda Mekan Ýazmuradow, 22-nji minutda Abdyresul Abdyýew, 34-nji minutda Aly Haýdarow tapawutlandy. 72-nji minutda Guwanç Berdimyradow oýna soňky nokady goýdy. 80-nji minutda Wezirgeldi Ylýasowyň ikinji sary duýduryş alandan soň meýdandan çykarylmagy bilen, «Nebitçi» hem azlykda galmaly boldy.