Türkmenistanly türgen Alp Arslan Begenjow Gyrgyzystanyň paýtagty Bişkekde 6-12-nji aprel aralygynda geçirilen ulularyň arasynda erkin göreş boýunça Aziýa çempionatynda bürünç medal gazanmagy başardy. Türkmen türgeni 86 kg agram derejesinde çykyş etdi.

Saýlama tapgyrda Begenjow mongol türgeni Býambadorzh Bat Erdene garşy 10:0 hasabynda, tehniki artykmaçlyk bilen ýeňiş gazandy. Çärýek finalda Alp Arslan täjigistanly Bahodur Kodirowdan 10:0 hasabynda üstün çykdy.

Ýarym finalda Begenjow eýranly göreşiji Kamran Gorban Gasempurdan 0:11 hasabynda tehniki artykmaçlyk bilen ýeňildi we üçünji orun ugrundaky duşuşyga geçdi.

Bürünç medal ugrundaky duşuşykda türkmen türgeni ýaponiýaly Ýudaý Takahaşi bilen duşuşdy we 10:5 hasabynda ýeňiş gazanyp, yklym çempionatynyň baýragyna mynasyp boldy.

Altyn medal eýranly Kamran Gorban Gasempura nesip etdi — ol finalda hindistanly Mukul Dahiýany 7:0 hasaby bilen ýeňdi.