18-nji aprelde Aşgabatda «FinFest Turkmenistan 2026» atly maliýe hyzmatlarynyň ikinji festiwaly  geçiriler. Türkmenistanyň Ykdysatçylar birleşmesiniň goldaw bermeginde «Устойчивый Финансовый центр» («Durnukly Maliýe merkezi») HJ-niň we «Açyk ýürek» HJ-niň guramagynda geçiriljek çäre ilatyň maliýe sowatlylygyny ýokarlandyrmaga, maliýe hyzmatlaryndan netijeli peýdalanmak medeniýetini ösdürmäge we ýurduň maliýe bazarynyň durnukly ösüşine goldaw bermäge gönükdirilen professional bilim we aragatnaşyk platformasy hökmünde hyzmat eder.

Festiwal banklary, ätiýaçlandyryş, dellalçylyk, audit, IT we konsalting kompaniýalaryny, bilim merkezlerini, telekeçileri, ýaşlary we giň halk köpçüligini bir ýere jemlär. Birinji «FinFest-den» tapawutlylykda, şu ýylky maksatnama interaktiw gatnaşyga we amaly okuwlara esaslanýar: panel çekişmeleri, ussatlyk sapaklary, «Açyk mikrofon» sessiýalary, bilermenler bilen şahsy maslahatlar we maliýe ýarmarkasy.

Guramaçylar çagalaryň maliýe sowatlylygy zolagyna aýratyn üns berdiler. Bu ýerde çagalar binýatlyk maliýe başarnyklary bilen tanşyp bilerler, bank önümleriniň esaslaryny özleşdirip, oýunlar we amaly meseleler arkaly maliýe jogapkärçiligini öwrenip bilerler.

Festiwalyň esasy temalary sanly maliýe çözgütleri, maýa goýumlary, ätiýaçlandyryş, töwekgelçilikleri dolandyrmak, ESG we durnukly ösüş, şeýle hem jemgyýetiň geljegine maýa goýum hökmünde maliýe sowatlylygy ýaly ugurlary öz içine alar. Bu çäre kiçi we orta kärhanalara, ýaşlara, talyplara, geljekki telekeçilere, maşgalalara we çagalara, şeýle hem jemgyýetçilik we halkara guramalaryna gönükdirilendir.

Festiwala gatnaşmak üçin hasaba alyş www.finfest-tm.com resmi saýtynda eýýäm açykdyr. Ýerleriň sany çäklidir.

Guramaçylaryň maglumatlary:
«Устойчивый Финансовый центр» HJ
+99362609454 / +99364973003
fincenterygtybarly@gmail.com, info@finfest-tm.com