Şu gün 18-nji noýabrda Türkmenistanyň Prezidenti Serdar Berdimuhamedow wise-premýer T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. "Watan" habarlar gepleşiginde habar berlişi ýaly, iş maslahatynda ýurduň oba hojalyk toplumynda we welaýatlarynda alnyp barylýan işler hem-de Oba milli maksatnamasynyň ýerine ýetirilişi bilen baglanyşykly meselelere garaldy.
Welaýatlaryň häkimleri möwsümleýin oba hojalyk işleriniň barşy barada hasabatlary berdiler.
Hasabatlarda bellenilişi ýaly, häzirki wagtda welaýatlarda pagta hasylyny soňky hanasyna çenli ýitgisiz ýygnap almak boýunça degişli işler guramaçylykly dowam edýär, hasyl bökdençsiz kabul edilýär. Ýygym möwsüminde oba hojalyk tehnikalary, kabul ediş harmanhanalary, pagta arassalaýjy kärhanalar netijeli işledilýär. Bugdaý ekilen meýdanlarda ideg işleri agrotehnikanyň kadalaryna laýyk ýerine ýetirilýär.
Hasabatlarda geljek ýylyň hasyly üçin welaýatlarda gowaça ekiljek ýerleri ekiş möwsümine taýýarlamak üçin sürüm işleriniň meýilnamalaýyn esasda alnyp barylýandygy barada hem aýdyldy.
Häkimler welaýatlaryň çäklerindäki edara-kärhanalaryň, bilim, saglygy goraýyş, sport we medeniýet ulgamlarynyň binalarynyň, ýaşaýyş jaýlarynyň ýyladyş ulgamlaryny talabalaýyk işletmek boýunça görülýän çäreler hem-de Oba milli maksatnamasyna laýyklykda, şu ýyl welaýatlarda açylyp ulanmaga berilmegi meýilleşdirilen medeni-durmuş, önümçilik maksatly desgalarda gurluşyk işleriniň ýagdaýy barada-da hasabat berdiler.
Prezident Serdar Berdimuhamedow hasabatlary diňläp, pagta hasylyny soňky hanasyna çenli ýitgisiz ýygnap almak, bugdaý ekilen ýerlerde ideg işlerini agrotehniki kadalara laýyk ýerine ýetirmek üçin ähli zerur çäreleri görmegi tabşyrdy.
Döwlet Baştutany Oba milli maksatnamasyna laýyklykda şu ýyl welaýatlarda açylyp ulanmaga berilmegi meýilleşdirilen medeni-durmuş, önümçilik maksatly desgalarda gurluşyk işleriniň öz wagtynda we ýokary hilli ýerine ýetirilmegini gözegçilikde saklamagy tabşyrdy.
Iş maslahatynyň barşynda wise-premýer T.Atahallyýew hem ýurtda dowam edýän möwsümleýin oba hojalyk işleriniň barşy barada hasabat berdi. Hasabatda geljek ýylyň hasyly üçin welaýatlarda gowaça ekiljek ýerlerde sürüm işleriniň dowam edýändigi, Daşoguz we Lebap welaýatlarynda şaly hasylynyň, Mary welaýatynda bolsa gant şugundyrynyň hasylynyň ýygnalýandygy barada hem aýdyldy.
Döwlet Baştutany hasabaty diňläp, oba hojalyk pudagynyň öňünde durýan möhüm wezipelere ünsi çekdi we wise-premýere dowam edýän möwsümleýin oba hojalyk işleriniň ýokary hilli, talabalaýyk geçirilmegini gözegçilikde saklamagy tabşyrdy.
Prezident Serdar Berdimuhamedow iş maslahatyna gatnaşyjylara ýüzlenip, welaýatlarda ýetişdirilen pagtany iň soňky hanasyna çenli ýygnap almak üçin geçirilýän işlere berk gözegçilik etmegiň, ýygymda kombaýnlaryň we beýleki tehnikalaryň, pagta arassalaýjy kärhanalaryň hem-de kabul ediş harmanhanalarynyň doly güýjünde we netijeli işledilmeginiň möhümdigini belledi.
Döwlet Baştutany welaýatlarda bugdaý ekilen ýerlerde ideg işleriniň geçirilişine berk gözegçilik etmegi, haşal otlara garşy işleriň öz wagtynda alnyp barylmagyny, bugdaý ekilen meýdanlarda gögeriş we birinji ösüş suwuny tutmak, ekini mineral dökünler bilen iýmitlendirmek işleriniň agrotehniki möhletlerde geçirilmegini üpjün etmegi, ekilen bugdaýdan kadaly gögeriş alynmagyna aýratyn üns bermegi tabşyrdy.
Welaýatlarda geljek ýylyň hasyly üçin gowaça ekiljek ýerlerde sürüm işleriniň talabalaýyk geçirilmegini berk gözegçilikde saklamak, önüm öndürijiler bilen hyzmat ediji edara-kärhanalaryň arasynda şu ýylyň pagta, geljek ýylyň bugdaý hasyly üçin ýerine ýetirilen işler üçin hasaplaşyklaryň öz wagtynda geçirilmegini üpjün etmek tabşyryldy.
Prezident Serdar Berdimuhamedow Daşoguz we Lebap welaýatlarynda şalynyň, Mary welaýatynda bolsa gant şugundyrynyň hasylynyň ýitgisiz ýygnalmagyny, welaýatlardaky bilim, medeniýet, dolandyryş, jemgyýetçilik edaralarynyň we ýaşaýyş jaýlarynyň ýyladyş ulgamlarynyň kadaly işledilmegini üpjün etmek babatda hem degişli görkezmeleri berdi.
Döwlet Baştutany şeýle hem degişli maksatnamalarda bellenilen wezipeleriň üstünlikli ýerine ýetirilmeginiň möhümdigine ünsi çekip, welaýatlarda şu ýyl üçin meýilleşdirilen işleriň öz wagtynda we ýokary hilli amala aşyrylmagy babatda zerur çäreleri görmegi tabşyrdy.
