Türkmenistanly talyplar Polşa Respublikasynyň Katowiçe şäherinde 2024-nji ýylyň 7 — 10-njy noýabry aralygynda geçirilen matematika dersi boýunça halkara bäsleşigine gatnaşyp, uly üstünlik gazandylar. Matematika dersi boýunça geçirilen halkara bäsleşiginde talyplar şahsy bäsleşikde – altyn medallaryň – 6-syna, kümüş medallaryň – 9-syna, bürünç medallaryň – 11-sine şonuň ýaly-da, toparlaýyn bäsleşikde 1 kümüş, 3 sany bürünç medallara mynasyp boldular. Bu barada Magtymguly adyndaky Türkmen döwlet uniwersitetiniň resmi saýtynda habar berildi.

Matematika dersi boýunça halkara bäsleşigi Angliýa, Awstriýa, Şweýsariýa, Polşa, Slowakiýa, Sloweniýa, Wengriýa, Özbegistan we Türkmenistan ýaly döwletleriň 9-synyň 35 sany ýokary okuw mekdebinden 160-a golaý talyp ýaşlaryň gatnaşmagynda geçirildi. Bu halkara bäsleşigine ýurduň 10 sany ýokary okuw mekdeplerinden talyplar gatnaşdylar.

Magtymguly adyndaky Türkmen döwlet uniwersitetiniň talyplary 3 altyn, 2 kümüş, 1 bürünç medallara, Halkara ynsanperwer ylymlary we ösüş uniwersitetiniň talyplary 2 altyn, 2 kümüş, 1 bürünç medallara, Türkmenistanyň Oguz han adyndaky Inžener-tehnologiýalar uniwersitetiniň talyplary 1 altyn, 1 bürünç medallara, Türkmen döwlet binagärlik-gurluşyk institutynyň talyplary 2 kümüş medala, Türkmenistanyň Döwlet energetika institutynyň talyplary 1 kümüş, 2 bürünç medallara, Türkmenistanyň Telekommunikasiýalar we informatika institutynyň talyplary 1 kümüş, 2 bürünç medallara, Seýitnazar Seýdi adyndaky Türkmen döwlet mugallymçylyk institutynyň talyplary 1 kümüş medala, Türkmen döwlet ykdysadyýet we dolandyryş institutynyň talyplary 2 bürünç medala, S.A.Nyýazow adyndaky Türkmen oba hojalyk uniwersitetiniň talyplary 1 bürünç medala, Türkmen oba hojalyk institutynyň talyby 1 bürünç medala, mynasyp boldular.

Toparlaýyn bäsleşikde Halkara ynsanperwer ylymlary we ösüş uniwersitetiniň topary kümüş medala, Magtymguly adyndaky Türkmen döwlet uniwersitetiniň topary bürünç medala, Türkmen döwlet ykdysadyýet we dolandyryş institutynyň, Türkmenistanyň Döwlet energetika institutynyň bilelikdäki topary bürünç medala, Magtymguly adyndaky Türkmen döwlet uniwersitetiniň, Seýitnazar Seýdi adyndaky Türkmen döwlet mugallymçylyk institutynyň, S.A.Nyýazow adyndaky Türkmen oba hojalyk uniwersitetiniň, Türkmen oba hojalyk institutynyň bilelikdäki topary bürünç medala mynasyp boldular.