Türkmen zyýaratçylary Mekgä we Medinä haj parzyny tamamladylar we Watanyna gaýdyp geldiler, Türkmenistandaky hojalyklarda «akylly» gaz hasaplaýjy enjamlary gurnalar, Türkmenistanyň Merkezi saýlaw topary Mejlisiň deputatlygyna saýlawlaryň jemini jemledi we beýleki habarlar

Türkmenistanda

1. Türkmenistandan zyýaratçylaryň uly topary haj parzyny berjaý etmek üçin yslam dünýäsiniň mukaddes künjegi bolan Saud Arabystanynda boldular. Düýn şol toparyň galan bölegi-de Türkmenistana gaýdyp geldi. Zyýaratçylar ýörite uçarda Aşgabat Halkara howa menziline geldiler. Soňra olar döwrebap awtobuslarda «Parahat-7» ýaşaýyş toplumynda ýerleşýän Hezreti Omar metjidine bardylar. Metjidiň ýanynda olary dogan-garyndaşlary, dost-ýarlary garşyladylar.

2. Türkmenistanyň Ministrler Kabinetiniň mejlisinde wise-premýer Batyr Amanow gaz üpjünçilik ulgamynda sanly ulgamy ornaşdyrmak babatda alnyp barylýan işler barada Prezident Serdar Berdimuhamedowa hasabat berdi. Bellenilişi ýaly, hojalyklarda tebigy gazyň has netijeli ulanylmagyny üpjün «akylly» gaz hasaplaýjy enjamlarynyň gurnalmagy esasy ugurlaryň biridir.

3. Aşgabatda Türkmenistanda Saýlawlary we sala salşyklary geçirmek boýunça merkezi toparyň mejlisi geçirildi. Gün tertibiniň esasy meselesi 7-nji iýulda paýtagtyň üç saýlaw okrugynda geçirilen Türkmenistanyň Mejlisiniň deputatlarynyň saýlawlarynyň jemini jemlemek boldy. Aşgabat şäheriniň saýlaw komissiýasynyň başlygynyň maglumatyna görä, saýlawlar demokratik ýörelgeler esasynda, alternatiw we aýdyň şertlerde geçirildi. Saýlawçylaryň gatnaşygy ýokary boldy: saýlawlara ses bermäge hukugy bolan raýatlaryň umumy sanynyň 91,32 göterimi gatnaşdy. Ses bermegiň netijesinde 9 dalaşgärden köp ses alan 3 deputat saýlandy.

4. Geçen hepde Astanada Türkmenistanyň we Gazagystanyň daşary işler ministrleri – Raşid Meredowyň we Murat Nurtleunyň arasynda duşuşyk geçirildi. Gepleşikleriň dowamynda taraplar syýasy, söwda-ykdysady, ulag-üstaşyr, energetika, medeni-ynsanperwer ulgamlary öz içine alýan ikitaraplaýyn hyzmatdaşlygyň giň ugurlaryny ara alyp maslahatlaşdylar. Ministrler öňde boljak ýokary derejedäki halkara duşuşyklaryň tertibi barada hem ylalaşdylar.

5. Ulýanowsk sebitinden Türkmenistana täze konteýner otlusynyň gatnawy ýola goýlar. Täze gatnaw arkaly rus harytlarynyň «Orta Wolga — Hazar deňzi — Pars aýlagy» gündogar demir ýol geçelgesiniň ugry bilen Türkmenistana we goňşy döwletlere — Owganystana, Eýrana, Pakistana çalt eltiljekdigi bellenilýär.

6. Eýran Yslam Respublikasynyň Maşad lukmançylyk uniwersitetinde türkmen halkynyň Milli Lideri Gurbanguly Berdimuhamedowyň pars diline terjime edilen «Türkmenistanyň dermanlyk ösümlikleri» atly kitabynyň birinji tomunyň tanyşdyrylyş dabarasy boldy. Tanyşdyryş dabarasynda çykyş edenler bu ylmy ensiklopediýanyň eýranly lukmanlaryň arasynda uly gyzyklanma döredendigini bellediler. Onuň pars diline edilen terjimesi eýranly okyjylar üçin peýdaly bolar.

Dünýäde

7. Gazagystanyň Medeniýet we maglumat ministrligi Milli meýletinçiler tory bilen bilelikde «Asylly işler marafony» atly giň gerimli taslamanyň işe girizilendigini habar berdi. Bu başlangyç meýletinçilik we haýyr-sahawat işlerine gatnaşýan ähli gazagystanlylaryň tagallalaryny birleşdirmäge gönükdirilendir. Taslama yzygiderli «Ýagşylyk hepdeliklerini» we möhüm senelere, halkara baýramçylyklara hem-de dürli jemgyýetçilik we medeni çärelere bagyşlanan ýyllyk mowzuklaýyn çäreleri geçirmegi göz öňünde tutýar.

8. «DreamWorks Animation» studiýasy sosial ulgamlarda meşhur «Şrek» animasiýa filmleriniň bäşinji bölüminiň çykýandygy baradaky maglumatlary paýlaşdy. Meşhur ýaşyl ogryň hekaýasynyň täze bölümi 2026-njy ýylyň 1-nji iýulynda çykar. Baş gahrymanlara asyl düzümiň ýyldyz aktýorlary ses bererler.

Sport habarlary

9. Türkmenistanyň futbol boýunça 20 ýaşa çenli ýaşlar ýygyndysy Merkezi Aziýanyň futbol assosiasiýasynyň çempionatynda bäşinji ýer ugrunda Owganystanyň ýygyndysy bilen duşuşar. Oýun 11-nji iýulda, penşenbe güni Jelalabatda geçiriler. Eýranyň we Gyrgyzystanyň toparlary ýaryşyň finalynda oýnar we 3-nji ýer ugrundaky oýun Täjigistan bilen Özbegistanyň arasynda geçiriler.

10. Ispaniýanyň milli ýygyndysy futbol boýunça Ýewropa çempionatynyň ýarymfinalynda Fransiýadan ynamly üstün çykdy. Mýunhende geçirilen oýun ispanlaryň peýdasyna 2:1 hasabynda tamamlandy. Ýeňijileriň düzüminde Lamin Ýamal we Dani Olmo tapawutlandylar. Fransuzlardan Randal Kolo-Muani gol geçirdi. Ispaniýanyň milli ýygyndysy «Ýewro – 2024-iň» finalynda Niderlandlar bilen Angliýanyň arasyndaky duşuşygyň ýeňijisi bilen oýnar.