17-nji maýda hormatly Prezidentimiz Serdar Berdimuhamedow «Wozroždeniýe» kompaniýasynyň ýolbaşçysy Igor Bukatony kabul etdi.
Hormatly Prezidentimiz we Russiýanyň kompaniýasynyň ýolbaşçysy hyzmatdaşlygyň häzirki ýagdaýy hem-de bar bolan köpugurly mümkinçilikleri we ýurdumyzda ýaýbaňlandyrylan giň gerimli şähergurluşyk maksatnamasyny hasaba almak bilen, ony mundan beýläk-de ösdürmegiň möhüm ugurlary boýunça pikir alyşdylar. Şunuň bilen baglylykda, «Wozroždeniýe» kompaniýasynyň Türkmenistanda, hususan-da, paýtagtymyzda birnäçe möhüm düzümleýin taslamalary amala aşyrýandygy bellenildi, bu barada THP habar berýär.
Döwlet Baştutanymyz ikitaraplaýyn hyzmatdaşlygyň geljegi baradaky gürrüňi dowam edip, Türkmenistanyň innowasion ösüş strategiýasyny durmuşa geçirmek bilen ähli ulgamlarda iň gowy daşary ýurt tejribesini we döwrebap işläp taýýarlamalary peýdalanmagy ugur edinýändigini hem-de russiýaly hyzmatdaşlaryň anyk tekliplerine garamaga taýýardygyny belledi.
