Mary welaýatynyň Garagum etrabynyň etrabynyň gallaçy kärendeçileri 2024-nji ýylyň hasyly üçin geçen ýylyň güýzünde 21 müň 200 gektar meýdana tohum sepdiler. Şonuň 4 müň 390 gektary Üçdepe ýaýlasynda ekildi. Ekiş geçirilen meýdanlarda doly gögeriş alan gallaçylar şu ýyl etrap boýunça 44 müň 400 tonna bugdaý hasylyny ýygnamagy maksat edinýärler. Bu barada «Türkmenistan» gazetinde habar berildi.

Habarda bellenilişi ýaly, häzirki wagtda daýhanlar ak ekinlere agrotehnikanyň kadalaryna laýyklykda göwnejaý ideg edip, suw tutmak, dökün bermek ýaly gaýragoýulmasyz işleri geçirýärler. Ekinlere dökün bermekde etrap boýunça döwrebap tehnikalaryň 18-siniň hyzmatyndan netijeli peýdalanylýar. «Garagum kanaly», «Baýramaly» daýhan birleşikleriniň gallaçylary bolsa bu işde has-da tapawutlanýarlar.

Daýhan birleşikleriniň pagtaçy kärendeçileri, daýhan hojalyklarynyň önüm öndürijileri, ýer eýeleri şu ýylda etrap boýunça 20 müň 400 gektar meýdana gowaça ekdiler. Sebitde her ýyl gowaçanyň toprak-howa şertlerine uýgunlaşan, kesellere durnukly, hasyllylygy ýokary bolan «Ýolöten — 7» orta süýümli görnüşi ekilip, bereketli hasyl ýetişdirilýär. Agrotehnikanyň kadalaryna laýyklykda, aýny wagtynda ekiş geçirilen ýerlerde kadaly gögeriş gazanylyp, hatarara bejergi işlerine girişildi. Zähmetkeşler şu ýyl 49 müň tonna golaý pagta hasylyny ýygnamagy maksat edinýärler.

Şeýle hem Garagum etrabynyň ekerançylardyr işewürleri, ýer eýeleri 1 müň gektar meýdana ýeralma ekdiler. Ekişde takyk ekiji gurallaryň hyzmatyndan ýerlikli peýdalanyldy. Bu işde «Baýramaly», «Garagum kanaly», «Ak altyn» daýhan birleşikleriniň daýhanlary köplere oňat görelde görkezdiler.