«Astana» diplomatik kluby türkmen telekeçilerini Gazagystanyň paýtagtynda geçiriljek işewürlik missiýasyna gatnaşmaga çagyrýar. Bu çäre 2024-nji ýylyň 19 — 23-nji fewraly aralygynda geçiriler.
Işewürlik missiýasynyň maksady — türkmenistanly telekeçilere Astananyň işewürlik hem-de maýa goýum potensialy bilen tanyşmak üçin mümkinçilik döretmekden ybarat. Saparyň çäklerinde gatnaşyjylar ykdysadyýetiň dürli pudaklaryna degişli bolan kärhanalara we guramalara baryp görerler, şeýle hem Gazagystanyň döwlet edaralarynyň we işewürlik pudagynyň wekilleri bilen duşuşarlar.
Astana — Gazagystanyň iň uly, häzirki zaman hem-de iň çalt ösýän şäherleriniň biri. Bu şäher sebitiň iş, syýasy, şeýle-de maliýe merkezidir. Şäher ýokary durmuş derejesine, çalt depginde ösýän bazara, ösen infrastruktura hem-de dürli sosial-ykdysady ugurlary sanlylaşdyrmak taslamalaryna eýedir.
«Astana» diplomatik klubunyň iş saparlary gatnaşyjylara şertnamalary baglaşmak, taslamalary durmuşa geçirmek we beýleki şertnamalar ýaly oňyn netijeleri gazanmaga ýardam etmäge gönükdirilen.
2023-nji ýylda Gazagystanyň telekeçileriniň şu hili işewürlik missiýalarynyň çäklerinde Türkmenistana iki gezek baryp görendigini bellemelidiris.
Işewürlik missiýasyna gatnaşmaga isleg bildirýän türkmen telekeçileri «Astana» diplomatik klubunyň Aşgabatdaky wekilligi bolan «Zemin Syýahat» hojalyk jemgyýetiniň wekillerinden şu telefon belgisi arkaly goşmaça maglumat alyp bilerler: (+993 62) 60 68 85.
Çäräniň deslapky maksatnamasy bilen klubuň web saýtyndan tanyşmak bolýar.
