Ozal habar berşimiz ýaly, Türkmenistanyň Daşary syýasat edarasynyň ýolbaşçylygyndaky türkmen wekiliýeti Ýaponiýada saparda bolýar. Saparynyň çäklerinde Ministrler Kabinetiniň Başlygynyň orunbasary, Türkmenistanyň daşary işler ministri Raşid Meredow Ýaponiýanyň Ministrler Kabinetiniň Baş sekretary Ýesimasa Haýaşi bilen duşuşdy.
Haýaşi Raşid Meredowyň öňki saparyndan bir ýyl soň Ýaponiýa bolýan saparyny mübärekledi, şeýle hem Noto ýarymadasyndaky ýertitremesi bilen baglanyşykly Türkmenistanyň iberen gynanç hatyna minnetdarlyk bildirdi. Duşuşykda 2022-nji ýylyň dekabrynda Tokioda geçirilen daşary işler ministrleriniň «Merkezi Aziýa+Ýaponiýa» formatyndaky 9-njy duşuşygynyň çäginde ara alnyp maslahatlaşylan ykdysady gatnaşyklar, bilim we medeniýet pudagyndaky hyzmatdaşlygy pugtalandyrmak baradaky öňe sürlen başlangyçlar barada pikir alşyldy. Şeýle hem R.Meredow bilen Ý.Haýaşi ikitaraplaýyn gatnaşyklary mundan beýläk-de pugtalandyrmak we Merkezi Aziýa bilen Ýaponiýanyň arasyndaky gatnaşyklar barada pikir alyşdylar.
