Arkadag şäheriniň adybir futbol topary ilkinji möwsüminde ikinji baýragyna mynasyp boldy. Ýakynda möwsüm tamamlanmanka, Türkmenistanyň çempionatynda beýleki garşydaşlaryndan arany has açyp, çempion bolan topar şu gün «Arkadag» stadionynda geçirilen duşuşykda «Ahaly» 3:0 hasabynda ýeňip, Türkmenistanyň Kubogynyň hem eýesi boldy.
Final duşuşygy diýseň çekeleşikli boldy. Bassyr iki ýyl bäri AFK-nyň Çempionlar ligasyna gatnaşyp, tejribesini artdyran «Ahal» ilkinji minutlarda güýçli garşydaşyna mynasyp garşylyk görkezen hem bolsa, öz şäherinde, öz janköýerleriniň arasynda duşuşýan «Arkadag» topary derrew oýnuň gidişini eline aldy. Şeýlelikde, 29-njy minutda goragçy Abdy Bäşimow tapawutlanyp, finaldaky ilkinji pökgini öz adyna ýazdyrdy.
Birinji ýarymy «Arkadag» toparynyň 1:0 hasabyndaky ýeňşi bilen tamamlanan duşuşygyň 52-nji minudynda ýene-de Abdy Bäşimow sahna çykyp, toparynyň ikinji pökgüsini hem geçirdi. Final duşuşygynyň jemleýji sözüni ýarym goragçy Ilýa Tamurkiniň 68-nji minutda geçiren pökgüsi sözledi.
Şeýlelikde, «Arkadag» futbol topary Türkmenistanyň Kubogynyň 30 ýyllyk taryhynda oňa mynasyp bolan 11-nji topar hökmünde taryha girdi. Mundan ozal Aşgabadyň «Köpetdag», «Altyn asyr», «Ýedigen», «Nisa», Balkanabadyň «Nebitçi», Änewiň «Ahal», Marynyň «Merw», Türkmenbaşy şäheriniň «Şagadam» we Daşoguz şäheriniň «Turan» toparlary bu Kubogy gazanyp görüpdiler.
Ilkinji möwsümini goşa baýrak bilen başlan «Arkadag» topary Kubok ýaryşynyň 2023-nji ýyldaky möwsüminde iň köp duşuşyk geçiren topar boldy. Özi hem toparyň Kubok ýaryşyndaky ýoly beýleki garşydaşlarynyň aglabasy ýaly, çärýek finaldan däl-de, deslapky tapgyrdan başlady. Şol tapgyrda Marynyň «Energetigini» iki duşuşykda 4:0 hasabynda ýeňen «Arkadag» topary çärýek finalda «Köpetdagy» (5:1, 4:1), ýarym finalda bolsa «Altyn asyry» (4:1, 4:0) ýaryşdan çykardy. Finala çenli üstünlikli gelen «Ahal» bolsa ýaryşa çärýek finaldan girişip, şol tapgyrda «Şagadamy» (4:1, 3:0), ýarym finalda bolsa «Merwi» (1:1, 1:0) ýeňdi. Taryhynda bu Kuboga dört gezek mynasyp bolan «Ahalyň» bassyr üç ýyl bäri finala çenli baryp bilendigini, geçen ýyl bolsa dördünji Kubogyny gazanandygyny ýatlamak gerek.
Şeýlelikde, «Arkadag» futbol topary ilkinji möwsümini rekord derejesindäki üstünlikler bilen tamamlady. Möwsümde resmi duşuşyklaryň 31-sini geçiren topar şolaryň ählisinde ýeňiş gazandy. Topar Türkmenistanyň çempionatynda we Kubok ýaryşynda bilelikde garşydaş derwezelere 111 pökgi geçirdi, öz derwezesinde bolsa bary-ýogy 20 pökgi gördi. 31 duşuşykda toparyň futbolçylarynyň 21-si tapawutlandy. Olaryň başyny 35 pökgi bilen hüjümçi Didar Durdyýew çekýär. 13 gezek tapawutlanan Begmyrat Baýow ikinji, 9 pökgi geçiren Şanazar Tirkişow üçünji orunda. Bu netijeler toparyň öňümizdäki möwsümde yklym ýaryşlaryna gatnaşmak mümkinçiligini artdyran. Ilkinji möwsümindäki resmi duşuşyklarynyň ählisini milli ýaryşlarda geçiren «Arkadag» futbol toparyna halkara giňişliginde hem üstünlikleri arzuw edýäris.
