19-njy sentýabrda Hytaýyň Şensi welaýatynyň Ýanlin şäherinde oba hojalygy ministrleriniň «Hytaý — Merkezi Aziýa» görnüşindäki ilkinji maslahaty geçirildi. Hytaý Halk Respublikasynyň oba hojalygy ministri Tan Ženszýanyň ýolbaşçylygyndaky maslahata Türkmenistandan ilçi Parahat Durdyýew gatnaşdy diýip, «nCa» internet portaly habar berdi.
Şeýle hem maslahata Merkezi Aziýa ýurtlaryndan Gyrgyzystanyň oba hojalygy ministri Askarberk Žanybekow, Täjigistanyň oba hojalygy ministri Kurbon Hakimzoda, Özbegistanyň oba hojalygy ministri Aziz Woitow, Gazagystanyň oba hojalygynyň ministriniň orunbasary Erbol Tasjurekow gatnaşdy.
Oba hojalygynda ýokary derejeli ykdysady we söwda hyzmatdaşlygyny ösdürmek, azyk howpsuzlygyny we oba hojalygynyň durnukly ösüşini goldamak meseleleri forumyň esasy mowzuklarynyň hataryndan orun aldy.
“Hytaý bilen Merkezi Aziýanyň bäş ýurdunyň arasynda diplomatik gatnaşyklar ýola goýlandan bäri 31 ýylyň içinde oba hojalygy alyş-çalyşlary çalt ösdi, hyzmatdaşlygyň mehanizmleri has kämilleşdi, oba hojalyk önümleriniň söwdasy çalt ilerledi, maýa goýum hyzmatdaşlygy has işjeňleşdi we tehniki alyş-çalyşlar has çuňlaşdy. Hytaý—Merkezi Aziýa oba hojalygynyň alyş-çalyşlarynyň we hyzmatdaşlygynyň çuňlaşdyrylmagy berk binýada eýedir» diýip, Tan Ženszýan belledi.
HHR-iň oba hojalygy edarasynyň başlygy öz çykyşynda Merkezi Aziýa sebitiniň ýurtlary bilen hyzmatdaşlyk üçin birnäçe başlangyçlary öňe sürdi. Duşuşygyň netijesinde agrosenagat toplumynda ileri tutulýan ugurlarda maýa goýum we söwda hyzmatdaşlygyny has-da çuňlaşdyrmak barada Bilelikdäki beýannama kabul edildi.
Taraplar Hytaý—Merkezi Aziýa görnüşinde oba hojalygynyň söwdasy we ykdysady hyzmatdaşlygy boýunça Iş toparyny döretmek barada ylalaşdylar.
