Girmek
2023-nji ýylyň ýanwar — awgust aýlarynda Özbegistanda türkmen maýa goýumynyň gatnaşmagynda 33 sany täze kärhana döredildi. Şeýlelikde, Türkmenistan degişli sanawda sekizinji orundan ýer aldy. Bu barada Özbegistanyň Prezidentiniň ýanyndaky Statistika agentligi habar berdi.
Hasabat döwründe Özbegistanda Merkezi Aziýa döwletleriniň maýa goýumlarynyň gatnaşmagynda jemi 207 sany täze bilelikdäki kärhana döredilipdir. Şonuň 15,9 göterimi Türkmenistanyň paýyna düşýär.
Umumylykda alnanda, 2023-nji ýylyň 8 aýynyň dowamynda Özbegistanda döredilen bilelikdäki karhanalaryň aglaba bölegi rus, hytaý we türk maýa goýumynyň gatnaşmagynda döredilipdir. Has takygy, şu ýylyň ýanwar — awgust aýlarynda ýurtda Russiýanyň maýa goýumynyň gatnaşmagynda 425 sany, Hytaýyň maýa goýumynyň gatnaşmagynda 383 sany we Türkiýäniň maýa goýumynyň gatnaşmagynda 157 sany täze kärhana hasaba alnypdyr.
Çeşmede bellenilişine görä, häzirki wagtda Özbegistanda türkmen maýa goýumynyň gatnaşmagynda döredilen kärhanalaryň 136-sy hereket edýär. Türkmenistan bu sanawda 11-nji orundan ýer alypdyr. Ýokardaky sanawda bolşy ýaly, daşary ýurt maýa goýumynyň hasabyna açylan hem-de häzirki wagtda hereket edýän kärhanalar babatda hem Russiýa (2849 sany), Hytaý (1929 sany) we Türkiýe (1719 sany) öňdebaryjylyk edýär.