Eýran Yslam Respublikasynyň Türkmenistandaky diplomatik wekilhanasynyň başlygy Golam Abbas Arbab Hales «Hazar deňzi – dostluk we ylalaşyk deňzi» atly ylmy-amaly maslahatyň çäginde «CentralAsia.news»-yň habarçysy bilen bolan söhbetdeşlikde ulag pudagynda türkmen-eýran ykdysady gatnaşyklarynyň ösüşi barada gürrüň berdi.

Diplomat Russiýanyň Türkmenistanyň «Demirgazyk—Günorta» halkara ulag geçelgesine (ITC) goşulmagyny tassyklamagy meselesi barada durup geçip, Türkmenistanyň bu geçelgäniň birleşdiriji nokady bolup durýandygy üçin öz ýurdundan hem oňyn karara garaşylýandygyny mälim etdi.

— Häzirki wagtda bu mesele boýunça rus tarapy bilen habarlaşyp durýarys. Bu babatda sebitleýin ulag hyzmatdaşlygynda Türkmenistanyň kuwwatyna 100 göterim ynam bilen baha berilip bilinjekdigini belläp geçýärin. Türkmenistan bu geçelgäniň birleşdiriji nokatlaryndan biri bolar — diýip, diplomat belleýär.

Onuň belleýşi ýaly, häzirki wagtda Türkmenistan bilen Eýranyň dört gözegçilik nokady arkaly baglanyşýandygyny bellemek gerek. Bular Sarahs (Ahal welaýaty), Artyk-Lutfabat (Ahal welaýaty), Inçeburun (Etrek, Balkan welaýaty) we Bajgyran (Aşgabat). Mundan başga-da, Türkmenbaşynyň halkara porty bilen Bandar Ali (Golestan welaýaty, Hazar deňziniň günorta-gündogar kenary) we Bandarabas portlary arkaly göni baglanyşyk bar. Bu meselede ilçi Aşgabadyň Tähran üçin ýokary hyzmatdaş hökmündäki ornuna ünsi çekdi.

— Elbetde, Türkmenistanyň uly geostrategik baglanyşyk potensialy bar — diýip, Golam Abbas Arbab Hales nygtaýar.