Şu gün Türkmenistanyň futbol çempionatynda 12-nji tapgyryň duşuşyklary geçirildi. Ozal hem habar berşimiz ýaly, tapgyrda geçirilen üç duşuşykda «Arkadag», «Nebitçi» we «Energetik» toparlarynyň degişlilikde «Köpetdagy», «Aşgabady» we «Şagadamy» ýeňendigini ýatladýarys. Tapgyrdaky «Merw» ― «Ahal» duşuşygy ätiýaçlykdaky günleriň birine geçirildi.

Yzda galan 12 tapgyrda 9 duşuşyk geçiren «Arkadag» futbol topary 27 utuk bilen ýaryşyň başyny çekýär. 11 duşuşykda 22 utuk toplap bilen «Nebitçi» «Altyn asyryň» dynç alan tapgyrynda ikinji orna göterilmäge mümkinçilik aldy. Möwsümiň başyndan bäri 10 duşuşyk geçiren «Altyn asyrda» 20 utuk bar.

Ýeri gelende aýtsak, «Nebitçi» şu möwsümde 20 utuklyk sepgide ýetip bilen üçünji topar boldy.

Dördünji orundaky «Köpetdagyň» 17, bäşinjilikdäki «Aşgabadyň» 13, altynjylykdaky «Energetigiň» 12 utugy bar. Utuklaryň arasynyň ýakyn bolmagy indiki tapgyrlarda dördünji orun ugrundaky göreşiň has ýitileşjekdigini görkezýär.

Möwsümde heniz üç topara 10 utuklyk sepgide ýetmek başardanok. Olar ýedinji orundaky «Şagadam» (7 utuk), sekizinjilikdäki «Merw» we dokuzynjy basgançakdaky «Ahaldyr» (ikisinde hem 6 utukdan bar).

Şu tapgyrda «Aşgabadyň» we «Energetigiň» möwsümdäki 10-njy duşuşygyny geçirendigini hem aýtmak gerek. Şeýle hem tapgyryň duşuşyklarynda «Nebitçiniň» derwezesinden 10-njy, «Aşgabadyň» derwezesinden bolsa 20-nji pökgi geçirildi.

Çempionatyň şu möwsüminde geçirilen gollaryň sanynyň hem 130-a tegelenendigini habar berýäris. Bu gollaryň deň ýaryndan gowragyny ― 72-sini ýaryş tertibiniň ilkinji üç ornundaky toparlar geçirdi.

Çempionatyň tablisasy: