Türkmenistanyň we Özbegistanyň wekilçilikli toparlary GDA-nyň II oýunlaryna gatnaşmak üçin Belarus Respublikasyna bardylar. Bu barada BELTA habar berýär.
Türkmenistanyň wekiliýetiniň düzüminde 110 adam bar. Olaryň 80-si sportuň 13 görnüşine wekilçilik edýän türgenlerdir. Türkmenistanly türgenler boks, taý boksy, karate, dzýudo, sambo, grek-rim göreşi, erkin göreş, agyr atletika, ýeňil atletika, basketbolyň 3х3 görnüşi (diňe erkekler) we nyşana ok atmak boýunça ýaryşlara gatnaşarlar.
Belarusyň sport we syýahatçylyk ministriniň orunbasary Oleg Andreýçik Minsk şäheriniň halkara howa menzilinde myhmanlar üçin ähli mümkinçilikleriň döredilendigini habar berdi.
Oýunlara 6 müň töweregi adam gatnaşar, olaryň 4 müň töweregi türgenler, 900-si tälimçi, 800-si eminlerdir. Oýunlar Belarusyň 11 şäherinde geçiriler.
