Gyrgyzystanyň futbol boýunça milli ýygyndysynyň ozalky baş tälimçisi Aleksandr Kretinin Daşkentiň «Bunýodkor» futbol toparynyň tälimçiligine getirildi. Bu barada klubyň resmi saýty habar berýär.
«Aleksanr Sergeýewiç Daşkente geldi. Ol «Bunýodkoryň» edara binasynda klubyň direktory Murat Aliýew bilen duşuşdy. Duşuşykda topary çempionatyň ikinji aýlawyna taýýarlygyň meseleleri, geljeki meýiller we şertnamanyň aýratynlyklary barada pikir alyşyldy» diýip, klubyň metbugat gullugy ýazýar.
Gyrgyzystanyň Futbol bileleşiginiň 44 ýaşly hünärmeni şu ýylyň aprel aýynda işden boşadandygyny ýatladýarys. Ol gyrgyz ýygyndysyna 2014-nji ýyldan bäri tälim berip gelýärdi.
Krestinin PRO derejeli tälimçilik ygtyýarnamasynyň eýesidir. Ol Gyrgyzystanda köp sanly baýraklara, şol sanda «Ýylyň iň gowy tälimçisi» diýen ada hem mynasyp boldy. Onuň täze topary bolsa taryhynda bäş gezek Özbegistanyň çempiony boldy, dört gezek ýurduň ýurduň Futbol kubogyny gazandy. «Bunýodkoryň» iki gezek AFK-nyň Çempionlar ligasynyp ýarym finalyna çenli baryp ýetendigini hem ýatlamak gerek.
2008 ― 2010-njy ýyllar aralygynda «Bunýodkorda» Braziliýanyň ýygyndysy bilen dünýäniň çempiony bolan Riwaldo hem çykyş etdi. 13 duşuşykda 16 utuk toplap bilen «Bunýodkor» häzirki wagtda Özbegistanyň Superligasynda dokuzynjy orny eýeleýär. Ýaryşyň başyny çekýän «Nawbahorda» bolsa 29 utuk bar.
