Türkmenistanyň Döwlet daşary ykdysady iş bankynyň başlygy Rahymberdi Jepbarow Türkmenistanyň Daşary işler ministrliginiň Halkara gatnaşyklary institutynda geçirilen «Yslam ösüş banky we doktor Ahmad Mohammad Ali. Institutyň taryhy we onuň prezidentiniň ýoly» atly kitabyň tanyşdyrylyş dabarasynda moderator hökmünde çykyş etdi.
Mälim bolşy ýaly, bu kitap türkmen halkynyň Milli Lideri, Halk Maslahatynyň Başlygy Gurbanguly Berdimuhamedowa Saud Arabystany Patyşalygyna sapary wagtynda Yslam ösüş bankynyň prezidenti Ahmad Mohammad Ali Al-Madani tarapyndan sowgat berildi. Onuň sahypalarynda Yslam Ösüş Bankynyň taryhy, alyp barýan işleri we bankyň agza ýurtlary, şol sanda Türkmenistan bilen hyzmatdaşlyk barada gürrüň berilýär.
Ýurduň Daşary işler ministrliginiň web saýtynda bellenilişi ýaly, Türkmenistanyň Ministrler Kabinetiniň başlygynyň orunbasary, daşary işler ministri Raşid Meredow dabara gatnaşyjylara ýüzlenip, Türkmenistan bilen YÖB-niň arasyndaky köp ýyllyk hyzmatdaşlygyň çäklerinde bankyň 1994-nji ýyldan bäri ýurtda 26 taslamany maliýeleşdirendigini belledi. Bu taslamalar ýurduň durnukly durmuş-ykdysady ösüşi üçin möhüm ähmiýete eýe bolup, olar lukmançylyk we saglygy goraýyş, suw hojalygy, demir ýol we derýa ýollary, telekommunikasiýa we gaz geçiriji infrastrukturalar ýaly pudaklara degişlidir.
Maslahata gatnaşyjylaryň, şol sanda Türkmenistanyň Döwlet daşary ykdysady iş bankynyň başlygynyň çykyşynda, YÖB-niň taryhyna, häzirki gününe we alyp barýan netijeli işine ähmiýet berlip, maliýe guramasynyň agza ýurtlary, şol sanda Türkmenistan bilen hyzmatdaşlygynyň ösüşi barada anyk maglumatlar berildi. Türkmenistan bilen Yslam Ösüş Bankynyň arasynda söwda we ykdysady ugurlaryň köpüsinde hyzmatdaşlygy durmuşa geçirmegiň çäginde, esasan-da, umumadamzat ähmiýetli taslamalary durmuşa geçirmäge gönükdirilen maýa goýum syýasaty babatda uzak möhletleýin we netijeli hyzmatdaşlygy ösdürmek nygtaldy.
Ýokary okuw mekdebiniň binasynyň eýwanynda guralan sergide Türkmenistanyň Döwlet daşary ykdysady iş bankynyň pawilýony ýerleşdirilip, ol Türkmenistan bilen Yslam Ösüş Bankynyň bilelikdäki taslamalaryna we hyzmatdaşlygyna bagyşlandy.
