Aşgabatda Russiýa Federasiýasynyň Türkmenistandaky ilçihanasy bilen ýurduň Medeniýet ministrliginiň bilelikde guramagynda geçirilen rus kinosynyň hepdeligi jemlendi. 9-njy iýunda badalga alan hepdeligiň dowamynda rus medeniýetine degişli bolan birnäçe çeper we animasion filmler görkezildi.

«Aşgabat» kinoteatrynda režissýor Dmitriý Dýaçenkonyň komediýa žanrynda döreden «Iň soňky batyr» atly çeper filminiň 2017, 2020, 2021-nji ýyllarda düşürilen bölümleri görkezildi. Bu barada «Türkmenistan» gazetinde habar berildi. Hepdelik bu filmiň 2021-nji ýylda düşürilen «Tümlügiň ilçisi» bölümi bilen badalga aldy. Şeýle hem bu ýerde 13 sany multfilm görkezilip, olaryň arasynda 1997-nji ýylda režissýorlar Ýuriý Butyriniň, Aleksandr Lýutkewiçiň, Andreý Ignatenkonyň bilelikde surata düşüren «Bilmezejik Aýda», režissýor Ilýa Maksimowyň 2003-nji ýylda ýaýlyma berlen «Göýdük burunlak», režissýor Konstantin Bronzitiň 2004-nji ýylyň önümi bolan «Alýoşa Popowiç we ýylanbaş Tugarin» multfilmleri hem bar.

«Berkarar» söwda we dynç alyş merkeziniň kinoteatrynda geçen ýyl surata düşürilen çeper filmler görkezildi. Hepdeligiň dowamynda bu ýerde režissýor Renat Dawletýarowyň maşgala durmuşyndan söz açýan «Jadygöýler», Dmitriý Dýaçenkonyň hem şol tema degişli «Çeburaşka» atly filmleri tomaşaçylar köpçüligine ýetirildi. Şeýle hem bu ýerde kiçi ýaşly tomaşaçylar üçin Konstantin Feoktistowyň «Şazada Iwan we çal möjek — 5» hem-de Wasiliý Rawenskiniň «Ermitažyň pişikleri» multfilmleri görkezildi.