Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Russiýa Federasiýasynyň Prezidenti Wladimir Putine, Russiýa Federasiýasynyň Federal Ýygnagynyň Federasiýa Geňeşiniň Başlygy hanym Walentina Matwiýenko we ýurduň ähli dostlukly halkyna uly döwlet baýramy — Russiýanyň güni mynasybetli tüýs ýürekden gutlaglaryny iberdi. Bu barada «Türkmenistan» gazetinde habar berildi.
— Syýasy, söwda-ykdysady, durmuş, medeni-ynsanperwer ugurlar boýunça yzygiderli pugtalanýan we ösýän türkmen-rus gatnaşyklarynyň ýokary derejesini bellemek guwandyryjydyr. Türkmenistanyň we Russiýanyň döwletara gatnaşyklary mundan beýläk-de giňeltmäge ygrarly bolmagy umumy abadançylygyň bähbitlerine laýyk gelýär — diýip, Gurbanguly Berdimuhamedow Wladimir Putine ýollan gutlag hatynda belleýär.
Türkmenistanyň Halk Maslahatynyň Başlygy Russiýa Federasiýasynyň Federal Ýygnagynyň Federasiýa Geňeşiniň Başlygy hanym Walentina Matwiýenko iberen gutlag hatynda bolsa:
— Biziň ýurtlarymyzyň arasynda ýola goýlan özara gatnaşyklaryň derejesine Türkmenistanda ýokary baha berilýär. Türkmen-rus hyzmatdaşlygynyň halklarymyzyň bähbitlerine mundan beýläk-de depginli ösdüriljekdigine we pugtalandyryljakdygyna berk ynanýaryn — diýip belledi.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow gutlag hatlarynda Prezident Wladimir Putine, RF-niň Federal Ýygnagynyň Federasiýa Geňeşiniň Başlygy hanym Walentina Matwiýenko berk jan saglyk, bagtyýarlyk we üstünlik, Russiýa Federasiýasynyň ähli halkyna bolsa abadançylyk we gülläp ösüş arzuw etdi.
