Girmek
Şu gün Türkmenistanyň we Täjigistanyň futbol boýunça milli ýygyndylary biri-biri bilen taryhda dokuzynjy gezek duşuşarlar ― diýip, «Janköýer» ýazýar.
Iki ýygyndynyň arasynda ozal geçirilen 8 duşuşygyň 5-si ýoldaşlyk duşuşyklarydyr. Şeýle hem iki ýygyndy dünýä çempionatynyň saýlama tapgyrlarynda 2, AFK-nyň Çagyryş kubogynda bir gezek duşuşdylar.
Taryhdaky ilkinji Türkmenistan ― Täjigistan duşuşygy 1992-nji ýylyň 11-nji iýulynda geçirildi. Aşgabatdaky «Köpetdag» stadionynda bolan şol ýoldaşlyk duşuşygy 3:3 hasabyndaky deňlik bilen tamamlandy.
Döredilen ilkinji ýyllarynda juda güýçli oýny orta goýan türkmen ýygyndysy 1993-nji ýylyň 2-nji iýunyndaky we 1994-nji ýylyň 19-njy aprelindäki ýoldaşlyk duşuşyklarynda täjik ýygyndysyny utdy. Bu duşuşyklaryň birinjisi 6:0, ikinjisi bolsa 2:0 hasabynda türkmen ýygyndysynyň peýdasyna tamamlandy.
Türkmenistanyň futbol boýunça milli ýygyndysy Täjigistanyň ýygyndysyndan taryhynda ilkinji gezek 1997-nji ýylyň 25-nji maýynda Dünýä kubogy ― 1998-iň saýlama tapgyrynda ýeňildi. Duşuşyk 2:1 hasabynda täjik ýygyndysynyň peýdasyna tamamlandy. Şondan bir aýa hem ýeter-ýetmez wagt soňra, has takygy, ýene şol ýylyň 22-nji iýunynda täjik ýygyndysy öz meýdanynda türkmen futbolçylaryny 5:0 hasabynda ýeňdi.
Şondan soň iki ýygyndy biri-biri bilen 11 ýyllap duşuşyk geçirmedi. Diňe 2008-nji ýylyň 30-njy iýulynda geçirilen ýoldaşlyk duşuşygy 0:0 hasabyndaky deňlik bilen tamamlandy. Iki ýygyndynyň 2010-njy ýylyň 24-nji fewralynda AFK-nyň Çagyryş kubogynyň çägindäki duşuşygy türkmenistanly futbolçylaryň 2:0 hasabyndaky ýeňşi bilen tamamlandy.
Ýygyndylaryň arasyndaky iň soňky duşuşyk 2016-njy ýylyň 9-njy noýabrynda geçirildi. Bu ýoldaşlyk duşuşygynda täjigistanly futbolçylar 3:0 hasabynda ýeňiş gazandylar.
Şeýlelikde, Täjigistan bilen geçiren 8 duşuşygynda 3 gezek ýeňip, 3 gezek hem ýeňlen, 2 duşuşygyny bolsa deňlikde geçiren türkmen ýygyndysy 9-njy duşuşygynda 4-nji ýeňşi üçin göreşer. Başgaça aýtsak, Mergen Orazowyň şägirtleri 13 ýyllyk arakesmeden soňra Täjigistanyň futbol boýunça milli ýygyndysyny ýeňmäge synanyşarlar.
Türkmenistandan bu duşuşyga Täjigistanyň «Futbol HD» we Özbegistanyň «Sport TV» teleýaýlymlary arkaly tomaşa edip boljakdygyny ýatladýarys.