«Forrest Gamp» atly rowaýaty filmde ýerine ýetiren baş keşbi üçin «Iň oňat erkek keşbi» ugry boýunça «Oskar» baýragyna mynasyp bolan aktýor Tom Henks ilkibada filmiň üstünlik gazanjakdygyna ynanmandyr. Ol bu barada «New Yorker Live» dabarasynda gürrüň berdi diýip, «Vesti.ru» ýazýar.
«Men: «Eý, Bob, sana bir sowalym bar. Bu filmiň, hakykatdanam, adamlara ýarajakdygyna ynanýarmyň?» diýdim» diýip, Henks meşhur filmiň režissýory Robert Zemekis bilen bolan gürrüňdeşligi ýatlady.
Zemekis öz nobatynda filmiň surata alnyşyna örän jogapkärçilikli çemeleşmelidigini, sähel ýalňyşlyga ýol berilse, barysynyň şemala sowruljakdygyny aýdypdyr. Olaryň azaby ýerine-de düşüpdir.
«Forrest Gamp» ýazyjy Uinston Grumuň adybir romany boýunça surata alyndy, ol 1994-nji ýylda ekranlara çykdy hem-de Robert Zemekisiň iň şowly filmi diýlip ykrar edildi. Film köp sanly kino baýraklaryna mynasyp boldy.
Filmde Tom Henks, Robin Raýt, Salli Fild, Heýli Joel Osment, Geri Siniz dagylar surata düşdüler.
Ýeri gelende aýtsak, şu ýyl hindi kino aktýory we režissýory Aamir Hanyň bu filmiň esasynda surata alnan «Lal Sinh Çadda» atly filmi ekranlara çykdy. Emma ol prokatda şowsuzlyga uçrady.
