Şu gün, 5-nji maýda Türkmenistanyň Daşary işler ministrliginde ministriň orunbasary B.Mätiýew Eýran Yslam Respublikasynyň Türkmenistandaky täze bellenen Baş konsuly (Mary ş.) Abdolmajid Kamju bilen duşuşdy.
Duşuşygyň başynda EYR-nyň Baş konsuly Türkmenistanyň daşary işler ministriniň orunbasaryna öz Konsullyk patentini gowşurdy. Öz gezeginde B.Mätiýew Eýran Yslam Respublikasynyň Türkmenistandaky Baş konsulyny täze işe girişmegi bilen gutlamak bilen, oňa konsullyk wezipelerini ýerine ýetirmäge rugsat berýän konsullyk ekzekwaturasyny gowşurdy. Bu barada ministrligiň resmi saýtynda habar berildi.
Geçirilen gepleşikleriň dowamynda taraplar Türkmenistan bilen Eýranyň arasyndaky ýokary derejeli gatnaşyklary barada nygtap geçdiler. Söhbetdeşler syýasy, söwda-ykdysady we medeni-ynsanperwer ugurlardaky ikitaraplaýyn gatnaşyklar barada gürrüň etdiler. Mary welaýatynyň we Horasan-e-Rezawi welaýatynyň arasyndaky netijeli hyzmatdaşlyk, hususan-da, söwda-ykdysady ugur we konsullyk hyzmatlaryny bermek babatdaky hyzmatdaşlyk barada bellenildi.
Söwda, ulag we energetika ugurlarynda ikitaraplaýyn hyzmatdaşlygyň mundan beýläk-de giňeldilmegi hem-de iki ýurduň serhetýaka welaýatlarynyň ýolbaşçylarynyň derejesinde yzygiderli duşuşyklaryň guralmagy boýunça pikir alyşyldy.
