Gyrgyzystanyň futbol Bileleşigi slowakiýaly hünärmen Ştefan Tarkowiçi ýurduň milli ýygyndysynyň baş tälimçiligine belledi. Bu barada bileleşigiň metbugat gullugy habar berdi.

50 ýaşly slowakiýaly tälimçi Ştefan Tarkowiç UEFA-nyň Pro tälimçilik ygtyýarnamasyna eýe bolup, ol 2022-nji ýyla çenli Slowakiýanyň milli ýygyndysyna tälim berdi. Slowakiýanyň milli ýygyndysy onuň golastynda Ýewro — 2020-niň saýlamasynda üstünlikli çykyş edip, ýaryşyň final tapgyryna ýollanma alypdy.

Gyrgyzystanyň milli ýygyndysynyň ozalky baş tälimçisi russiýaly Aleksandr Krestinin bolup, ol bu wezipede 2014-nji ýyldan bäri işläp gelýärdi.

Ýeri gelende bellesek, Gyrgyzystanyň milli ýygyndysy şu ýylyň 9-21-nji iýuny aralygynda Bişkek we Daşkent şäherlerinde geçiriljek Merkezi Aziýanyň futbol Assosiasiýasynyň ilkinji çempionatyna gatnaşar. Ýaryşda jemi ýedi topar: Türkmenistanyň, Eýranyň, Owganystanyň, Täjigistanyň, Özbegistanyň, Gyrgyzystanyň hem-de Omanyň milli ýygyndylary çykyş eder.