«Türkmenistan» awiakompaniýasy resmi web sahypasynda Aşgabatdan (Türkmenistan) Londona (Beýik Britaniýa) awiapetekleriň satuwyna başlady.
Saýtdan petekleri diňe Aşgabat (ASB) — London (STN) ugry boýunça uçuşlar üçin satyn alyp bilersiňiz. Iň ýakyn gidiş güni 5-nji aprel, petegiň bahasy 8706 manat. Görkezilen baha habar ýaýradylan gününden güýje girýär. Petekleri «Altyn Asyr» bank karty arkaly onlaýn satyn alyp bolýar.
20-nji martda türkmen awiakompaniýasy üç ýyllyk arakesmeden soň Angliýa yzygiderli gatnawlaryny gaýtadan ýola goýdy. Aşgabat — London (Stansted) — Aşgabat ugurlary boýunça uçuş hepdede bir gezek, çarşenbe güni amala aşyrylýar. Stansted howa menzili Londonyň 48 km demirgazyk-gündogarynda, Uttlesford sebitinde ýerleşýär.
Türkmenistan bilen Angliýanyň arasynda yzygiderli gatnawlaryň koronawirus pandemiýasy sebäpli 2020-nji ýylyň mart aýynda togtadylandygyny ýatladýarys. Pandemiýadan öň awiakompaniýa Aşgabatdan Birmingeme (BHX) uçuşlary amala aşyrýardy. 2019-njy ýylyň fewral aýynda Aşgabat bilen Londonyň (Hitrou howa menzili) arasyndaky göni uçuşlar kesilipdi.
«Türkmenistan» awiakompaniýasynyň häzirki uçuş tertibi awiakompaniýanyň web sahypasynda elýeterlidir.
