Aziýanyň Futbol Konfederasiýasynyň hem-de Türkmenistanyň Futbol federasiýasynyň bilelikde guramagynda Mary şäherinde «B» kategoriýany almak ugrunda AFK-nyň tälimçilik kursy geçiriler. Bu barada TFF-niň resmi saýty habar berýär.
Mary welaýatynyň Mary şäherinde geçiriljek tälimçilik kursunyň gözükdirijisi hökmünde ýurdumyzyň at gazanan tälimçisi Röwşen Muhadow çykyş eder.
Nazaryýetdir tejribeçilik sapaklaryny öz içine alýan okuw-ýygnanyşygy iki moduldan ybarat bolar. Onuň ilkinjisi şu ýylyň 22 ― 31-nji martyna çenli, ikinjisi bolsa 1 ― 11-nji maý aralygynda dowam eder. Birinji hem-de ikinji modulyň aralygynda gatnaşyjylar öz toparlarynda tejribe sapaklaryny geçerler.
Tälimçilik okuw-ýygnanyşygyna Türkmenistanyň dürli künjegine wekilçilik edýän futbol hünärmenleriň 20-den gowragynyň gatnaşmagyna garaşylýandygyny bellemek gerek.
Okuw-ýygnanyşygynyň soňunda geçiriljek synaglary üstünlikli geçenlere ýörite sertifikatlar gowşurylar.
