Täjigistanyň futbol ýygyndysynyň kapitany, Duşenbäniň «Istiklolynyň» ozalky goragçysy Ahtam Nazarow futbol ýoluny Özbegistanyň «Andijan» toparynda dowam etdirer.

«Istiklolyň» resmi saýtynyň habar berşi ýaly, Nazarow «Andijanyň» Türkiýedäki okuw-türgenleşik ýygnanyşygyna goşuldy. Ol topar bilen iki ýyllyk şertnama baglaşdy.

30 ýaşly Nazarow «Istiklola» 2013-nji ýylda goşulypdy. 2019 ― 2020-nji ýyllarda Bangladeşiň «Başundara Kings» toparynda futbol oýnap gelen goragçy gelip, ýene «Istiklola» goşuldy.

Nazarow milli ýygynda ilkinji gezek 2012-nji ýylda çagyryldy. Häzire çenli ol täjik ýygyndysynda geçiren 70 duşuşygynda 5 gezek tapawutlandy. Nazarow milli ýygyndynyň häzirki kapitanydyr.