ÝÇL-iň toparçalaýyn tapgyrynyň dördünji aýlawynda «Real» myhmançylykda «Şahtýor» bilen deň oýnady (Gollar: Zubkow 46 — Rýudiger 90+5). Şuňa garamazdan, «Real» öz utuklarynyň sanyny 10-a ýetirip, pleý-off tapgyryna adyny ýazdyrdy. Ikinji orundaky «Leýpsigde» 6, üçünji ýerdäki «Şahtýoryň» 5 utuk bar, emma olaryň özara oýunlarynyň bardygy sebäpli «Real» wagtyndan öň indiki tapgyr meselesini birýüzli etdi. Şeýlelikde, «Real» ÝÇL-däki 31-nji möwsüminde 31-nji gezek pleý-off tapgyryna gatnaşar. Korollyk gwardiýasy bu ýaryşa gatnaşan ähli möwsümlerinde toparçalaýyn tapgyrdan üstünlikli geçen ýeke-täk topar bolup dur.
Ysraýylyň Haýfa şäheriniň «Makkabi» topary ÝÇL-iň toparçalaýyn tapgyrynyň dördünji aýlawynda özüniň uzak ýyllara şowsuz seriýasyna nokat goýdy. Has takygy, ysraýyl kluby 2002-nji ýyldan bäri dowam edip gelýän turnirdäki ýeňişsiz seriýasyny «Ýuwentusy» 2:0 hasabynda (Gollar: Atsili 7, 42) ýeňmek arkaly bes etdi. Topar mundan ozal 2002-nji ýylyň oktýabrynda, özi üçin ÝÇL-däki debýut möwsüminde «Mançester Ýunaýtedi» 3:0 hasabynda ýeňlişe sezewar edipdi we şol ýeňiş häzire çenli ýeke-täkligine saklanýardy. «Makkabiden» ýeňlen «Ýuwentus» bolsa turnirdäki antirekordyny goýdy. Turin kluby ÝÇL-iň toparçalaýyn tapgyryndaky 4 oýnuň 3-sinde ýeňildi. Häzire çenli «Ýuwentus» bu turnirde beýle pes netije görkezmändi.
«PSŽ»-niň öz öýünde «Benfika» bilen 1:1 hasabynda (Gollar: Mbappe 39 p — Mariu 65 p) deň oýnan duşuşygynda Kliýan Mbappe taryhy netije gazandy. Ol oýundaky toparynyň ýeke-täk goluna awtorlyk edip, «PSŽ-niň» ÝÇL-däki iň köp gol uran oýunçysyna öwrüldi. Mbappe «PSŽ-niň» lybasynda bu ýaryşda 31 gol urdy we bu ugurda Edinson Kawanini (30) yzda galdyrdy.
Dortmundyň «Borussiýasynyň» ýarymgoragçysy Jud Bellingem toparynyň «Sewilýa» bilen oýnunda gol urup, turniriň rekordyny täzeledi. Ýagny Bellingem turnirdäki bassyr 4 oýunda gol urup, şeýle netije gazanan iň ýaş oýunçy boldy.
«Real» bilen bilelikde «Mançester Siti» hem ÝÇL-iň pleý-off tapgyryna wagtyndan öň adyny ýazdyrdy. Iňlis kluby myhmançylykda «Kopengagen» bilen deň oýnady, şuňa garamazdan, utuklaryny 10-a ýetirip, indiki tapgyrdaky çykyşyny kepillendirdi.
Tapgyryň esasy oýunlaryň ýene birinde «Milan» «Çelsini» myhman alyp, 0:2 hasabynda ýeňlişe sezewar boldy. Oýnuň 18-nji minutynda Tomoriniň meýdandan çetleşdirilmegi netije uly täsir etdi. Netijede Žoržinýonyň 21-nji minutdaky dürs ýerine ýetiren penaltisi we Obameýangyň 34-nji minutdaky goly «aristokratlara» 2:0 hasabyndaky ýeňşi sowgat etdi. Şeýlelikde «Çelsi» utuklarynyň sanyny 7-ä ýetirip, toparçasynda birinji orna göterildi.
Düýnki oýunlaryň netijeleri we toparçalardaky ýagdaýlar:
«E» toparça
«Milan» — «Çelsi» 0:2
«Dinamo» Zagreb — «Zalsburg» 1:1
«Çelsi» — 7
«Zalsburg» — 6
«Milan» — 4
«Dinamo» (Zagreb) — 4
«F» toparça
«Şahtýor» — «Real» 1:1
«Seltik» — «Leýpzig» 0:2
«Real» — 10
«Leýpzig» — 6
«Şahtýor» — 5
«Seltik» — 1
«G» toparça
«Borussiýa» (Dortmund) — «Sewilýa» 1:1
«Kopengagen» — «Mançester Siti» 0:0
«Mançester Siti» — 10
«Borussiýa» (Dortmund) — 7
«Kopengagen» — 2
«Sewilýa» — 2
«H» toparça
«Makkabi» (Haýfa) — «Ýuwentus» 2:0
«PSŽ» — «Benfika» 1:1
«PSŽ» — 8
«Benfika» — 8
«Ýuwentus» — 3
«Makkabi» (Haýfa) — 3
