Şu gün, 11-nji iýunda Aziýa kubogy – 2023-iň saýlama tapgyrynda Türkmenistanyň milli ýygyndysy ikinji tapgyryň çäginde Bangladeşiň ýygyndy topary bilen duşuşdy.
Malaýziýanyň Kuala-Lumpur şäherindäki «Bukit Jalil» stadionynda geçirilen oýun 2:1 hasabynda ildeşlerimiziň peýdasyna tamamlandy.
Oýnuň 7-nji minudynda Altymyrat Annadurdyýew hasaby açdy. 11-nji minutda Muhammet Ibrahim hasaby deňledi. Duşuşygyň 77-nji minudynda Arslanmyrat Amanow hasaby 2:1-e ýetirip, ýygyndymyza ýeňiş getiren goly derwezä girizdi.
Milli ýygyndylaryň öz aralarynda ilkinji duşuşygyny geçirendigini hem bellemek gerek.
Bangladeşiň ýygyndysynyň FIFA-nyň reýtinginde 188-nji orunda, Türkmenistanyň bolsa 134-nji orunda durandygyny ýatladýarys.
Geçirilen duşuşyklardan soň 3 utuk toplan Türkmenistanyň milli ýygyndysy toparçada üçünji orny eýeleýär.
Ýurdumyzyň milli ýygyndysy 14-nji iýunda üçünji tapgyryň duşuşygynda Bahreýniň milli ýygyndysy bilen duşuşar.
