Kazanda gämi gurluşyk we gämi abatlaýyş ulgamynda türkmen-tatarystan gatnaşyklarynyň meselelerine bagyşlanan duşuşyk geçirildi. Bu barada türkmen edarasynyň resmi saýtynda habar berilýär.
Türkmenistanyň Baş konsuly Atadurdy Baýramow bilen «Ak Bars» gämi gurluşyk korporasiýasy» PJ-niň Baş direktory Renat Mistahowyň arasynda geçirilen gepleşikleriň barşynda deňiz gatnawlary ulgamynda ileri tutulýan birnäçe ugurlar boýunça ylalaşyklar gazanyldy.
Hususan-da, taraplar Türkmenistanyň we Tatarystanyň gämi gurluşyk kuwwatlyklaryny öwrenmek, şeýle hem Türkmenistanda Ro-Ro kysymly iki sany parom gämisini we bir sany deňiz konteýner gatnadyjysyny gurmak maksady bilen ikitaraplaýyn saparlary meýilleşdirdiler.
Mundan başga-da, gepleşikleriň barşynda Türkmenbaşy Halkara deňiz portunyň çäginde ýerleşen «Balkan» gämi gurluşyk we gämi abatlaýyş zawody» AGPJ-ni mundan beýläk hem ösdürmek boýunça türkmen hünärmenlerini taýýarlamak meseleleri maslahatlaşyldy.
Belläp geçsek, 2019-2020-nji ýyllarda Türkmenistana «A.M.Gorkiý» adyndaky Zelenodolkiý zawodynda» gurlan A145 taslamasynyň iki sany ýokary tizlikli ýolagçy gämisi getirilipdi.
Şeýle-de okaň:
- Türkmenistanda ilkinji gury ýük gämisiniň gurluşygyna badalga berler
- Türkmenistanda demir ýol wagonlaryny daşamak üçin «Ro-Ro» gämileri gurlar
