«Urtopia» kompaniýasy köp täsir galdyryjy aýratynlyklara eýe bolan «Urtopia Carbon E-Bike» akylly elektrik tigrini çykarandygyny mälim etdi. Bu barada «Nebit-gaz» gazeti 2021-nji ýylyň 1-nji martyndaky sanynda «gizmochina.com» web sahypasynyň täzeliklerine salgylanyp habar berdi.
«Urtopia Carbon E-Bike» akylly tigriniň çarçuwasy uglerod süýüminden ýasalan we onuň agramy bary-ýogy 14 kg. Bu barada «Gizmochina» habar berýär. Ilki bilen, bu tigriň ýokary duýgurlyk we asuda gezelenç üçin «Gates Carbon Drive» guşagyny ulanýan «Smooth Transmission» ulgamy bilen üpjün edilendigini aýratyn bellemelidiris. Şeýle-de ulgamyň geçiriş datçigi we 5 kadasy bardyr (Pedal, Eco, Comfort, Sport, Turbo).
«Urtopia Carbon E-Bike» tigri «Urtopia»-nyň «Smartbar» diýip atlandyrýan innowasiýa tutawajyny aldy. Onuň ses arkaly dolandyryş güýji bolup, sürüji bilen aragatnaşygy saklaýar we hakyky wagtda «GPS» goldawy, «eSIM» goldawy, ýörite ekran, «OTA» täzelenmeleri üçin goldawy hem bardyr. Şeýle hem tigre «Wi-Fi», «Bluetooth» we «4G» birikdirip bolar.
Howpsuzlyk üçin içerki radar we giroskop bardyr. Radar sürüjä ýakynlaşýan ulaglar barada habar berýär, giroskop bolsa ýalňyş hereket bolsa duýduryş iberýär. Elektron akylly tigirde barmak yzy arkaly açmak we dolandyrmak mümkinçiligi hem ornaşdyrylypdyr.
Akylly elektron tigri öň we yzky yşyklar, öwrüm görkezijileri we jübüt proýektor çyralary bilen enjamlaşdyrylandyr. Ondaky aýratynlyklaryň köpüsine ýörite «Urtopia» programmasy arkaly gözegçilik edip bolýar.
