Türkmenabat şäher medeniýet öýünde Türkmenistanyň Zenanlar birleşiginiň welaýat bölümi tarapyndan yglan edilen «Ýylyň zenany» bäsleşiginiň jemleýji tapgyry geçirildi. Oňa ähli etrapdyr şäherlerden gelen gelin-gyzlaryň 20-si gatnaşdy. Olar bäsleşigiň şertine görä ýedi ugur boýunça öz ukyp-başarnyklaryny görkezdiler.
Bäsleşikde
Dänew etrabyndaky 23-nji «Dostluk» bakja-bagynda 30 ýyldan gowrak wagtdan bäri usulçy-terbiýeçisi bolup işleýän Gülaýym Myhmanowa «Ýylyň işewür zenany»;
Saýat etrabyndaky 14-nji orta mekdebiň zähmet mugallymy Şirin Gylyjowa «Ýylyň çeper elli zenany»;
Dänew etrabynyň çagalar sungat mekdebiniň mugallymy Merjen Kurbanowa «Ýylyň sungatda işjeň zenany»;
Saýat etrabyndaky 6-njy orta mekdebiň taryh mugallymy Aýjan Karýagdyýewa «Ýylyň mährem zenany»;
Kerki etrabynyň N-nji harby bölüminiň uly leýtenanty, gorag rotasynyň serkerdesiniň terbiýeçilik işleri boýunça orunbasary Sülgün Mamedowa «Ýylyň watançy zenany»;
Saýat etrabyndaky 34-nji orta mekdebiniň mugallymy Aýna Ýazmamedowa «Ýylyň öňdebaryjy oba zenany»;
Türkmenistanyň Senagatçylar we telekeçiler birleşmesiniň «Telekeçiler mekdebi» jemgyýetçilik guramasy kärhanasynyň Halaç şäheri boýunça müdiri Mahym Hudaýkulyýewa «Ýylyň telekeçi zenany» diýen atlara mynasyp boldular.
Ýeňijilere we bäsleşige işjeň gatnaşan gelin-gyzlaryň ählisine Türkmenistanyň Zenanlar birleşiginiň welaýat bölüminiň we Türkmenistanyň Kärdeşler arkalaşyklarynyň welaýat birleşmesiniň adyndan Hormat hatlary, ýadygärlik sowgatlary gowşuryldy.
