Girmek
Ertir, ýagny 9-njy fewralda Italiýanyň çempionaty “Serie A”-da Milan şäheriniň iki wekili “Inter” bilen “Milan” duşuşar. “Derby della Madonnina” diýlip atlandyrylýan bu derbi Aşgabat wagty bilen 00:45-de başlar. Duşuşyk “Türkmenistan sport” teleýaýlymy arkaly futbol muşdaklarynyň dykgatyna ýetiriler.
Bir wagtlaryň iň uly derbilerinden diýlip görkezilýän Milan derbisi resmi duşuşyklary hasaba alanyňda 225-nji gezek oýnalar. Mundan ozalky 224 oýunda “Inter” 81, “Milan” 76 gezek ýeňiş gazandy. 67 oýun deňlikde tamamlandy. “Inter” 305, “Milan” 299 gol geçirdi.
Resmi däl duşuşyklary hasaba alanyňda, 295 oýnan klublaryň şol duşuşyklarynda “Milan” 112, “Inter” 105 gezek ýeňiş gazandy (78 deňlik). Gollarda 454-429 “Milan” öňde.
Bir stadiony paýlaşýan we “Serie A”-da hersiniň 18 çempionlygy bolan iki toparyň arasynda iň golly oýun 1949-njy ýylda hasaba alnyp, “Inter” 6-5 ýeňýär.
Iň uly tapawutly ýeňiş gazanylan duşuşykda “Milan” 2001-nji ýylyň 11-nji maýynda “myhmançylykda” 6-0 hasabynda ezeli garşydaşyndan üstün çykýar.
Ilkinji gezek 1909-njy ýylyň 10-njy ýanwaryndan bäri oýnalyp gelinýän Milan derbilerinde iň köp gol geçiren oýunçy Andreý Şewçenko bolup, ukrainaly hüjümçi 14 gezek tapawutlanýar.
Soňky 18 resmi duşuşykda diňe 3 gezek ýeňen “Milan” möwsümiň 1-nji ýarymynda oýunda-da 2-0 utuldy.