Türkmenistanyň paýtagtynda 100-e golaý kompaniýanyň we işewürler birleşikleriniň gatnaşmagynda Türkiýe Respublikasynyň eksport harytlarynyň 12-nji sergisi öz işine başlady. Çäräniň açylyşyna resmi wekiliýet bilen Aşgabada gelen Türkiýe Respublikasynyň söwda ministri Ömer Bolat gatnaşdy. Sergi 10-njy fewraldan 12-nji fewral aralygynda dowam eder.

Sergi türk öndürijilerine we eksportçylaryna öz önümlerini türkmen bazarynda tanyşdyrmak hem-de täze işewürlik gatnaşyklaryny ýola goýmak üçin amatly mümkinçilik döredýär. Gatnaşyjylar dürli pudaklara degişli harytlaryň giň görnüşlerini görkezýärler. Guramaçylar türkmen kompaniýalaryny türkiýeli öndürijileriň önümleri bilen tanyşmaga we özara bähbitli hyzmatdaşlyk mümkinçiliklerini öwrenmäge çagyrýarlar.

Sergi bilen bir hatarda, Türkiýäniň söwda edarasynyň ýolbaşçysy Türkmenistanda ýokary derejeli birnäçe gepleşikleri geçirer. Ministr Bolatyň saparynyň meýilnamasynda Türkmenistanyň döwlet edaralarynyň we işewürler toparlarynyň wekilleri bilen duşuşyklar göz öňünde tutulan.

Her ýyl geçirilýän türk sergileri iki ýurduň arasyndaky söwda-ykdysady gatnaşyklary ösdürmek we söwda ulgamynda ikitaraplaýyn hyzmatdaşlygy berkitmek üçin köptaraplaýyn meýdança öwrüldi.