Sosial ulgamlarda Türkmenistanyň Döwlet sirkiniň täze Täze ýyl çykyşlaryna Aşgabadyň ýaşaýjylarynyň köp sanly hoşallykly teswirleri peýda boldy.

Sosial ulgamlary ulanyjylar tansçy-akrobatlaryň çykyşyny işjeň ara alyp maslahatlaşýarlar. Olar sirk arenasynda hakykatdanam joşgun döretmek bilen baýramçylyk ruhuny we şüweleňli şatlyk-şowhuny zala ýetirmegi başardylar.

«Tansçylar ajaýyp çykyş etdiler, diýseň gowy boldy. Uly täsir galdyrdy» - diýip, tomaşaçylaryň biri ýazýar.

Paýtagtymyzyň ýaşaýjylarynyň biri bolsa ýakyn günlerde çagalary bilen tomaşany görmäge gitjekdigini aýdypdyr:

«…Paýtagtymyzyň sirkiniň çykyşy maňa diýseň ýaraýar, men oňa her gün gatnamaga taýýar» — diýip, ol öz pikirini paýlaşypdyr.

Köp adamlar ýanwar aýynda sirkde geçiriljek ähli tomaşalara bilet alandyklaryny ýazýarlar.

«Super! Berekella, oglanlar! Şeýdip dowam ediň! Gaty gowy!» - diýip, tomaşaçylar joşgunly teswirleri bilen sirk artistlerini goldaýarlar.