Aziýanyň ösüş banky (AÖB) «Merkezi we Günbatar Aziýa üçin ykdysady bilimleri goldamak we mümkinçilikleri ösdürmek» atly sebitleýin taslamasyny durmuşa geçirmek üçin tehniki kömek bermegiň mümkinçiliklerini öwrenýär.

Bankyň resmi beýanatyna salgylanyp, «Report» neşiriniň habar bermegine görä, taslama Azerbaýjany, Ermenistany, Gruziýany, Gazagystany, Gyrgyz Respublikasyny, Pakistany, Täjigistany, Türkmenistany we Özbegistany öz içine alýar. 750 müň amerikan dollary möçberindäki maliýeleşdirme Tehniki kömek boýunça ýörite gazna arkaly amala aşyrylar. 

Bu başlangyç sebitiň ýurtlarynda ýokary hilli makroykdysady dolandyryşy, täsirli söwda we maýa goýum syýasatyny, hususy pudagy höweslendirmegi we täze iş orunlaryny döretmek boýunça toplumlaýyn özgertmeleri, ekologik çözgütleri hem-de sanlylaşdyrmagyň döwrebap çemeleşmelerini durmuşa geçirmegi maksat edinýär.