Girmek
Türkmenistanyň ÝHHG-däki wekiliýeti ýurduň deňiz kenaryndaky Awaza şäherinde geçirilen Deňze çykalgasy bolmadyk ösüp barýan ýurtlar boýunça BMG-niň Üçünji maslahaty (LLDC3) boýunça netijeler ÝHHG-e agza döwletleriniň dykgatyna ýetirdi. Bu barada Türkmenistanyň DIM-niň resmi saýtynda habar berildi.
Hereketleriň Awaza maksatnamasynyň (Awaza Programme of Action) kabul edilmegi deňze çykalgasy çäklendirilen ýurtlaryň ösüşinde ileri tutulýan ugurlaryny ilerletmekde möhüm tapgyr boldy. Maksatnama ulag we söwda arabaglanyşygyny giňeltmek, energetika hem-de sanly hyzmatdaşlygy ösdürmek, howanyň üýtgemegine durnuklylygy ýokarlandyrmak we Durnukly Ösüş Maksatlaryna ýetmäge ýardam bermek boýunça anyk çäreleri öz içine alýar.
Türkmen wekiliýeti öz beýanatynda Hereketleriň Awaza maksatnamasy bilen ÝHHG-niň gün tertibiniň, şol sanda ÝHHG Parlament Assambleýasynyň (PA OSCE) işiniň arasyndaky umumylygy belläp geçdi. Maksatnamanyň esasy ugurlary bolan arabaglanyşyk, durnuklylyk we durnukly ösüş — ÝHHG-niň syýasy-harby, ykdysady-ekologik we ynsanperwer ölçeglerini öz içine alýan toplumlaýyn howpsuzlyk konsepsiýasy bilen utgaşýar.
Wekiliýet Hereketleriň Awaza maksatnamasynyň durmuşa geçirilmeginiň ÝHHG-niň tagallalarynyň üstüni ýetirmek üçin amaly binýat bolup durýandygyny, sebitleýin durnuklylyga, durnukly ösüşe we ykdysady integrasiýa goşant goşýandygyny nygtady.