Ahal welaýatynda ýerleşýän täze Döwletli mekan obasynyň açylyş dabarasy milli öwüşginler bilen baýlaşdyryldy — dabaranyň gyzgalaňly pursatlarynyň dowamynda gelnalyjynyň gelmegi baýramçylygyň iň ýatda galyjy wakalarynyň biri boldy.

TDH agentliginiň habar bermegine görä, «gelnalyjynyň gelmegi bilen ýaýbaňlandyrylan durmuş toýy täze obanyň açylmagy mynasybetli dabara özboluşly öwüşgin çaýdy».

Ak bugdaý etrabynyň Öňaldy geňeşliginiň çäginde ýerleşýän täze obada 400 sany ýaşaýyş jaýyny, geňeşligiň edara binasyny, saglyk öýüni, 640 orunlyk orta mekdebi, 320 orunlyk çagalar bagyny, söwda merkezini özünde jemleýär. Bu ýerde söwda merkezi, döwrebap ýol-ulag, aragatnaşyk, suw, elektrik, gaz üpjünçilik hem-de lagym ulgamlary göz öňünde tutulypdyr.

Dabara gadymy türkmen däplerine laýyklykda geçirildi. Täze obadaky döwrebap öýlere göçüp gelen maşgalalar, asylly däbe görä, dabaranyň myhmanlaryna toý pişmelerini hödür etdiler. Her öýde gazanlar atarylyp, jaý toýlary tutuldy. Döwrebap öýleriň ýanynda türkmeniň gadymy oba durmuşyny we toý däplerini şöhlelendirýän gymmatlyklar görkezildi. Şeýle-de bu ýerde türkmen milli göreşi, ýaglyga towusmak boýunça ýaryşlar guraldy.

Dabara ýerli öz-özüňi dolandyryş edaralarynyň ýolbaşçylary, Türkmenistanyň Mejlisiniň, welaýat we etrap halk maslahatlarynyň, jemgyýetçilik guramalarynyň wekilleri, hormatly ýaşulular, etrabyň ýaşaýjylary gatnaşdylar. Gatnaşanlara Türkmenistanyň Prezidentiniň täze, döwrebap Döwletli mekan obasynyň açylyş dabarasyna gatnaşyjylara iberen Gutlagy okaldy.