14-nji maýda Täjigistanyň paýtagty Duşenbe şäherinde Garaşsyz Döwletleriň Arkalaşygynyň (GDA) Döredijilik we ylmy intelligensiýasynyň XVIII forumy öz işine başlady. Bu foruma Türkmenistanyň wekiliýeti hem gatnaşýar.

Şu ýylky forumyň şygary «Garaşsyz Döwletleriň Arkalaşygy: ynsanperwer hyzmatdaşlygyň täze gözýetimleri» diýlip atlandyrylyp, forumyň çäginde GDA ýurtlarynyň arasynda ynsanperwer hyzmatdaşlygyň möhüm meseleleri ara alnyp maslahatlaşylýar. Bu barada GDA-nyň Ýerine ýetiriji komitetiniň resmi web sahypasynda habar berilýär.

Forumyň gün tertibine şu aşakdaky dört sany esasy ugur boýunça çekişmeler girizilipdir: GDA halklarynyň taryhy umumylygy we Beýik Ýeňşe goşan goşandy; medeniýetde däp-dessurlar bilen innowasiýalaryň sazlaşykly utgaşmasy; ylmyň we bilimiň öňünde duran häzirki zaman wezipeleri; medianyň ynsanperwer gatnaşyklar ulgamyndaky orny.

GDA-nyň Baş sekretary Sergeý Lebedewiň gatnaşyjylara iberen gutlagynda:

«Şu gezekki forumyň çäklerinde plenar mejlisde we tematik çekişmelerde ylym, bilim, medeniýet we sungat işgärleri GDA ýurtlarynyň arasynda ynsanperwer, medeni, bilim we ylmy hyzmatdaşlygyň täze ileri tutulýan ugurlaryny jikme-jik ara alyp maslahatlaşarlar we kesgitlärler» diýlip bellenilýär.

Plenar mejlisiň dowamynda «Arkalaşygyň ýyldyzlary» atly döwletara baýragynyň hem-de «Arkalaşygyň ilkinji ädimleri» atly halkara baýragyň gowşurylyşy boldy. Mundan başga-da, «Arkalaşygyň medeni paýtagtlary» atly döwletara maksatnamasynyň tanyşdyrylyşy geçirildi.

Forumyň maksatnamasyna laýyklykda, şu gün agşam Sadriddin Aýni adyndaky Täjigistanyň Döwlet akademiki opera we balet teatrynda GDA-nyň Ýaşlar simfoniki orkestriniň konserti geçiriler. Bu orkestre şu ýyl Russiýanyň halk artisti, «Arkalaşygyň ýyldyzlary» baýragynyň eýesi Sergeý Skripka ýolbaşçylyk edýär.

Forum 15-nji maýa çenli dowam eder.